தமிழக வெற்றிக் கழகத்தின் தலைவர் விஜய் தலைமையிலான அமைச்சரவை இன்று விரிவாக்கம் செய்யப்பட்டு, காங்கிரஸ் மற்றும் தவெகவைச் சேர்ந்த 23 பேர் புதிய அமைச்சர்களாகப் பதவியேற்றுள்ளனர். ஆனால், தவெக அரசுக்கு ஆதரவளித்த அதிமுக எடப்பாடி அதிருப்தி அணியைச் சேர்ந்த எஸ்.பி.வேலுமணி, சி.வி.சண்முகம் உள்ளிட்டோருக்கு அமைச்சரவையில் இடம் மறுக்கப்பட்டுள்ளது. தவெக அரசு அமைந்தபோது முழுமையான பெரும்பான்மை இல்லாத சூழலில், இந்த அதிருப்தி அணியைச் சேர்ந்த 25 எம்.எல்.ஏ.க்கள் ஆதரவளித்ததால் இவர்களுக்கு அமைச்சரவையில் 4 அல்லது 5 இடங்கள் கிடைக்கும் என்று அரசியல் வட்டாரங்களில் பரவலாக எதிர்பார்க்கப்பட்ட நிலையில், இந்த முடிவு பெரும் வியப்பை ஏற்படுத்தியுள்ளது.
அதிமுக அதிருப்தி அணிக்கு அமைச்சர் பதவி வழங்கப்படாததற்குப் பின்னணியில் இருக்கும் முதல் முக்கிய காரணம் தகுதி நீக்கம் தொடர்பான சட்டச் சிக்கலாகும். எஸ்.பி.வேலுமணி மற்றும் சி.வி.சண்முகம் அணியைச் சேர்ந்த எம்.எல்.ஏ.க்கள் அனைவரும் அதிமுகவின் இரட்டை இலை சின்னத்தில் போட்டியிட்டு வென்றவர்கள் என்பதால், கட்சியின் கொறடா உத்தரவை மீறி விஜய் அரசுக்கு ஆதரவாக வாக்களித்த காரணத்திற்காக எடப்பாடி பழனிசாமி தரப்பு அவர்களைத் தகுதி நீக்கம் செய்ய தீவிர நடவடிக்கை எடுத்து வருகிறது. சபாநாயகர் மற்றும் நீதிமன்றம் வரை செல்லவிருக்கும் இந்த விவகாரத்தில், தகுதி நீக்க ஆபத்தில் இருக்கும் எம்.எல்.ஏ.க்களுக்கு அமைச்சர் பதவி வழங்கினால், பின்னர் நீதிமன்றம் அவர்களைத் தகுதி நீக்கம் செய்யும் பட்சத்தில் ஒட்டுமொத்த அமைச்சரவையே சட்டச் சிக்கலில் சிக்கிக்கொள்ளும் என்ற அச்சம் விஜய் தரப்புக்கு எழுந்துள்ளது.
இரண்டாவது முக்கிய காரணம், தவெக அரசுக்கு முட்டுக்கொடுத்து வரும் கூட்டணி கட்சிகளின் கடுமையான எதிர்ப்பாகும். தவெக அரசுக்கு ஆதரவளிக்கும் காங்கிரஸ், கம்யூனிஸ்ட் கட்சிகள், விசிக மற்றும் இந்திய யூனியன் முஸ்லிம் லீக் போன்ற கட்சிகள், அதிமுகவினரை அமைச்சரவையில் சேர்ப்பதை முற்றிலும் விரும்பவில்லை. குறிப்பாக, “அதிமுகவினரை அமைச்சரவையில் சேர்த்தால் ஆதரவை மறுபரிசீலனை செய்வோம்” என்று மார்க்சிஸ்ட் கம்யூனிஸ்ட் கட்சி வெளிப்படையாகவே எச்சரித்ததால், கூட்டணி கட்சிகளின் ஆதரவை இழக்க விரும்பாத தவெக தலைமை, புதிய அரசியல் மற்றும் கொள்கை ரீதியான பிரச்சனைகளைத் தவிர்க்கும் நோக்கில் இந்த அதிரடி முடிவை எடுத்துள்ளதாகக் கூறப்படுகிறது.
இந்த அரசியல் நகர்வுகளின் இறுதி முடிவாக, இன்று பதவியேற்ற 23 அமைச்சர்களில் தவெக மற்றும் காங்கிரஸ் உறுப்பினர்களுக்கு மட்டுமே வாய்ப்பு வழங்கப்பட்டுள்ளது. அதிமுக அதிருப்தி அணி, விசிக மற்றும் ஐயூஎம்எல் ஆகிய கட்சிகளுக்கு அமைச்சரவையில் இடம் மறுக்கப்பட்ட இந்தச் சூழல், தற்போது அதிமுக அதிருப்தி அணிக்குள் புதிய விரிசலையும் அதிருப்தியையும் ஏற்படுத்தியுள்ளது. இதன் காரணமாக, தங்களுக்கு அமைச்சர் பதவி கிடைக்காத விரக்தியில் இருக்கும் சில எம்.எல்.ஏ.க்கள், தங்களது அரசியல் எதிர்காலத்தைக் கருதி மீண்டும் எடப்பாடி பழனிசாமி தலைமையிலான முதன்மை அணிக்கே திரும்பும் வாய்ப்புகள் அதிகம் இருப்பதாக அரசியல் வட்டாரங்களில் தற்போதைய நிலவரப்படி பேசப்பட்டு வருகிறது.