பீட்ரூட்டில் இரும்புச்சத்து, ஃபோலேட் மற்றும் வைட்டமின் B12 போன்ற இரத்த அணுக்களின் உற்பத்திக்குத் தேவையான அத்தியாவசிய ஊட்டச்சத்துக்கள் நிறைந்துள்ளன. தினசரி பீட்ரூட் ஜூஸ் குடிப்பதன் மூலம் உடலில் நைட்ரிக் ஆக்சைடு உற்பத்தி அதிகரித்து, இரத்த நாளங்கள் நன்கு விரிவடைகின்றன. இது சீரான இரத்த ஓட்டத்திற்கு வழிவகுப்பதோடு, உயர் இரத்த அழுத்தப் பிரச்சினையைக் கட்டுப்படுத்தி இதய ஆரோக்கியத்தை மேம்படுத்துகிறது. மேலும், பாதிக்கப்பட்ட கல்லீரல் செல்களைப் புதுப்பிக்கவும், இரத்த அழுத்த மாறுபாட்டால் ஏற்படும் ஆண்மைக் குறைபாட்டுக்குத் தீர்வாகவும் இது அமைகிறது.
இரத்தத்தில் ஹீமோகுளோபின் அளவை அதிகரிப்பதில் முக்கிய பங்கு வகிக்கும் பீட்ரூட், சரும பராமரிப்பிலும் மாயாஜாலங்களை நிகழ்த்துகிறது. இதில் உள்ள லைகோபீன் (Lycopene) மற்றும் ஸ்குவாலேன் (Squalane) போன்ற விசேட வேதியியல் கலவைகள் ஆன்டி-ஏஜிங் (Anti-aging) விளைவுகளைக் கொண்டுள்ளன. இவை முகத்தில் ஏற்படும் சுருக்கங்களைக் குறைத்து, நீண்ட காலத்திற்கு சருமத்தைப் பளபளப்பாகவும், பொலிவாகவும் வைத்திருக்க உதவுகின்றன. இயற்கை முறையில் சருமத்தை வெண்மையாக்கவும், இளமையாக வைத்திருக்கவும் விரும்புபவர்கள் தினமும் ஒரு கிளாஸ் பீட்ரூட் ஜூஸை வழக்கமாக்கிக் கொள்ளலாம்.
பீட்ரூட் ஜூஸ் பல ஆரோக்கிய நன்மைகளை வாரி வழங்கினாலும், சர்க்கரை நோய் (Diabetes) உள்ளவர்கள் இதனை உட்கொள்ளும் போது மிகுந்த எச்சரிக்கையுடன் இருக்க வேண்டும். ஏனெனில், பீட்ரூட்டில் இயற்கையாகவே சர்க்கரை மற்றும் கார்போஹைட்ரேட்டுகளின் அளவு அதிகமாகக் காணப்படுகிறது. இதனைத் தொடர்ந்து தினமும் எடுத்துக் கொள்ளும் போது, இரத்தத்தில் சர்க்கரையின் அளவு திடீரென அதிகரிக்க வாய்ப்புள்ளது. எனவே, சர்க்கரை நோயாளிகள் பீட்ரூட் ஜூஸைத் தங்களின் உணவுமுறையில் சேர்க்கும் போது, தங்களின் இரத்த சர்க்கரை அளவை அடிக்கடி பரிசோதித்துக்கொள்வது அவசியமாகும்.