ஹரியானாவின் பல்வால் மாவட்டத்தில் உள்ள ஹோடல் ரயில் நிலையம் அருகே, திருமணமான மறுநாளே மணமகன் ரயில் முன் பாய்ந்து தற்கொலை செய்துகொண்ட நெஞ்சை உலுக்கும் சம்பவம் பெரும் அதிர்ச்சியை ஏற்படுத்தியுள்ளது. வாலி முகமதுபூர் பகுதியைச் சேர்ந்த ஓம் பிரகாஷ் என்பவருக்கும், உத்தரப் பிரதேசத்தின் மதுராவைச் சேர்ந்த பூமிகா என்ற பெண்ணுக்கும் கடந்த ஏப்ரல் 29 அன்று இந்து முறைப்படி திருமணம் நடந்துள்ளது. திருமணத்திற்கு அடுத்த நாள் மணமகள் வீட்டிற்கு அழைத்து வரப்பட்ட நிலையில், அன்று இரவே புதுமணத் தம்பதியருக்கு இடையே ஏதோ ஒரு மர்மமான விஷயம் தொடர்பாகக் கடுமையான வாக்குவாதம் ஏற்பட்டுள்ளது. இவர்களின் சத்தத்தை வீட்டில் இருந்த மற்ற குடும்ப உறுப்பினர்களும் கேட்டுள்ளனர்.
இந்தத் தற்கொலைக்குத் தூண்டுகோலாக, திருமண இரவுக்கு அடுத்த நாள் காலை முதல் ஓம் பிரகாஷின் கைபேசிக்கு வந்த தொடர் மிரட்டல் அழைப்புகள் அமைந்துள்ளன. மணமகள் பூமிகாவுக்கு நெருக்கமானவர்களான அஜய் நிஷாத், சஞ்சீவ், நாராயண் சிங் மற்றும் வேத்ராம் ஆகிய நான்கு இளைஞர்கள் வெவ்வேறு எண்களிலிருந்து ஓம் பிரகாஷைத் தொடர்பு கொண்டு பேசியுள்ளனர். அவர்கள் ஓம் பிரகாஷை மனரீதியாகக் கொடூரமாகத் துன்புறுத்தியதோடு, அவதூறு பரப்புவதாகவும், கடுமையான விளைவுகளைச் சந்திக்க நேரிடும் என்றும் மிரட்டிப் பணம் பறிக்க முயன்றுள்ளனர். இதனால் மிகுந்த பீதியும் மன உளைச்சலும் அடைந்த ஓம் பிரகாஷ், இதுகுறித்துத் தன் தந்தையிடம் கூறி அழுதுள்ளார். தந்தை ஆறுதல் கூறியும் மிரட்டல்கள் ஓயாததால், விரக்தியின் எல்லைக்குச் சென்ற ஓம் பிரகாஷ் மே 1 அன்று மதியம் அதிவேக ரயிலின் முன் பாய்ந்து தனது உயிரை மாய்த்துக் கொண்டார்.
சம்பவம் நடந்து சுமார் 16 நாட்களுக்குப் பிறகு, இறந்த ஓம் பிரகாஷின் சகோதரர் ஜெய் பகவான் அளித்த எழுத்துப்பூர்வ புகாரின் அடிப்படையில் ஃபரிதாபாத் அரசு ரயில்வே காவல்துறை (ஜிஆர்பி) தற்கொலைக்குத் தூண்டியதாக வழக்குப் பதிவு செய்துள்ளது. இந்த வழக்கில் மணமகள் பூமிகா மற்றும் மிரட்டல் விடுத்த அந்த நான்கு இளைஞர்கள் மீதும் முதல் தகவல் அறிக்கை (FIR) பதிவு செய்யப்பட்டுள்ளது. மணமகனின் மரணத்திற்குப் பொறுப்பானவர்களைக் கண்டறியவும், இந்த மிரட்டல்களின் பின்னணியில் உள்ள அசல் காரணத்தை வெளிக்கொண்டு வரவும் காவல்துறை தற்போது விசாரணையைத் தீவிரப்படுத்தியுள்ளது.