அமெரிக்காவிற்கும் ஈரானுக்கும் இடையே நிலவி வரும் மோதல்களை முடிவுக்குக் கொண்டு வருவதற்கான அமைதிப் பேச்சுவார்த்தை தற்போது முட்டுக்கட்டையில் முடிந்துள்ளது. இந்நிலையில், அமெரிக்க அதிபர் டொனால்ட் டிரம்ப் தனது ‘ட்ரூத் சோஷியல்’ சமூக வலைதளப் பக்கத்தில் ஈரானுக்குக் கடுமையான எச்சரிக்கை ஒன்றை விடுத்துள்ளார். அதில், “ஈரானுக்குக் காலம் கடந்து கொண்டிருக்கிறது, அவர்கள் விரைவாகச் செயல்பட வேண்டும்; இல்லையெனில் அவர்களைப் பற்றிப் பேச எதுவுமே மிஞ்சாது (அழிந்து போவார்கள்). நேரம் மிகவும் முக்கியமானது!” என்று அவர் பதிவிட்டுள்ளார்.
கடந்த பிப்ரவரி மாதம் முதல் இரு நாடுகளுக்கும் இடையே தீவிரமான ராணுவ மோதல்கள் மற்றும் தாக்குதல்கள் நடைபெற்று வருகின்றன. ஏப்ரல் மாதத்தில் ஒரு தற்காலிகப் போர்நிறுத்தம் எட்டப்பட்டபோதிலும், நிரந்தர அமைதிக்கான பேச்சுவார்த்தையில் எந்த முன்னேற்றமும் ஏற்படவில்லை. ஈரான் தனது அணுசக்தித் திட்டங்களைக் கட்டுப்படுத்த வேண்டும், செறிவூட்டப்பட்ட யுரேனியத்தை அமெரிக்காவிடம் ஒப்படைக்க வேண்டும் என்பன உள்ளிட்ட 5 முக்கிய நிபந்தனைகளை அமெரிக்கா விதித்துள்ளது. ஆனால், அமெரிக்கா தங்களுக்குப் போதிய சலுகைகளை வழங்கவில்லை என்று ஈரான் குற்றம் சாட்டியுள்ளது.
மறுபுறம் ஈரான் நாடு லெபனான் உள்ளிட்ட அனைத்துப் பகுதிகளிலும் போர் நிறுத்தப்பட வேண்டும், தங்கள் மீதான பொருளாதாரத் தடைகள் நீக்கப்பட வேண்டும் மற்றும் போரினால் ஏற்பட்ட சேதங்களுக்கு இழப்பீடு வழங்கப்பட வேண்டும் என்று கோரி வருகிறது. இந்த நிபந்தனைகளை அமெரிக்கா ஏற்க மறுத்துள்ளதால் பேச்சுவார்த்தை முடங்கியுள்ளது. தங்களின் நிபந்தனைகளுக்கு ஈரான் உடன்படாவிட்டால், கடுமையான ராணுவத் தாக்குதல்கள் மூலம் அந்நாட்டை முழுமையாக நிலைகுலையச் செய்யப் போவதாக டிரம்ப் மறைமுகமாக எச்சரித்துள்ளார்.