தமிழகத்தில் உள்ள டாஸ்மாக் மற்றும் எலைட் டாஸ்மாக் கடைகள் அனைத்தும் இரவு 10 மணிக்குள் கண்டிப்பாக மூடப்படுவதை உறுதி செய்ய வேண்டும் என்று காவல்துறைக்கு உத்தரவிடப்பட்டுள்ளது. மேலும், FL2 மற்றும் FL3 உரிமம் பெற்ற மதுக்கூடங்கள் (பார்கள்) தங்களுக்கு அனுமதிக்கப்பட்ட நேரங்களில் மட்டுமே மது விற்பனை செய்ய வேண்டும் என்று அறிவுறுத்தப்பட்டுள்ளது.
மதுக்கடைகள் மற்றும் பார்கள் மூடும் நேரம் தொடர்பான விதிமுறைகளை ஏதேனும் கடைகள் மீறினால், அந்தந்தப் பகுதிகளில் ரோந்துப் பணியில் ஈடுபடும் காவல்துறையினர் மீது கடுமையான நடவடிக்கை எடுக்கப்படும் என்று எச்சரிக்கப்பட்டுள்ளது. இதன் மூலம் இரவு நேர மது விற்பனையைக் கட்டுப்படுத்த காவல்துறைக்கு முழுப் பொறுப்பு வழங்கப்பட்டுள்ளது.
இவற்றுடன் சேர்த்து சட்டம் ஒழுங்கு மற்றும் நீதித்துறை சார்ந்த முக்கிய உத்தரவும் பிறப்பிக்கப்பட்டுள்ளது. அதன்படி, போக்சோ சட்டத்தின் கீழ் பதிவான வழக்குகளை 60 நாட்களுக்குள்ளும், கொலை வழக்குகளை 90 நாட்களுக்குள்ளும் விசாரணை செய்து விரைவாக முடிக்குமாறு அறிவுறுத்தப்பட்டுள்ளது.