பிரான்ஸ் நாட்டு கிராமப்புறங்களில் போதை தலைக்கேறிய நிலையில் தள்ளாடும் மான்களின் காணொளி தற்போது இணையத்தில் தீயாய் பரவி வருகிறது. காடுகளில் கீழே விழுந்து அழுகிப்போன பழங்களை இந்த மான்கள் உண்பதால், அந்தப் பழங்கள் இயற்கையாகவே நொதித்தல் (Fermentation) அடைந்து மதுவின் தன்மையைப் பெறுகின்றன. இதனைச் சாப்பிடும் மான்கள், தங்களை அறியாமலேயே போதையில் ஆட்டம் கண்டு, ஒரு குடிகாரனைப் போலவே விசித்திரமான அசைவுகளைச் செய்தபடி வட்டமடித்துக் கொண்டிருக்கின்றன.
வைரலான இந்தக் காணொளியில், மான் ஒன்று ஓரிடத்தில் நின்றுகொண்டு மீண்டும் மீண்டும் தன்னைத்தானே சுற்றிக் கொள்கிறது. வழக்கமாக மனிதர்களைக் கண்டால் மிரண்டு ஓடும் மான்கள், இந்த ‘காட்டு மது’வின் போதையில் சற்றும் பயமின்றி சாலையோரங்களில் தள்ளாடியபடி நிற்கின்றன. நிலைதடுமாறி ஓடக்கூட முடியாமல் தவிக்கும் இந்த மான்களின் விசித்திரச் செயலைப் பார்த்த நெட்டிசன்கள், “மான்களும் வார இறுதியை (Weekend) சிறப்பாகக் கொண்டாடுகின்றன” என்று நகைச்சுவையாகக் கருத்துக்களைப் பகிர்ந்து வருகின்றனர்.
இருப்பினும், இந்தச் சம்பவம் வேடிக்கையாகத் தெரிந்தாலும், பிரெஞ்சு காவல்துறை வாகன ஓட்டிகளுக்குக் கடுமையான எச்சரிக்கை விடுத்துள்ளது. போதையில் இருக்கும் மான்கள் திடீரென சாலைகளுக்கு வருவதால் விபத்துகள் ஏற்பட வாய்ப்புள்ளதாகக் கூறி, கிராமப்புற சாலைகளில் செல்லும் போது மிகுந்த கவனத்துடன் இருக்குமாறு அறிவுறுத்தியுள்ளனர். இது போன்ற புளித்த பழங்களை உண்பது மான்களின் உடல்நலத்தைப் பாதிப்பதோடு, அவற்றின் உயிருக்கும் ஆபத்தை விளைவிக்கும் என இயற்கை ஆர்வலர்கள் கவலை தெரிவித்துள்ளனர்.