தலைநகர் டெல்லியில், ஓடும் சொகுசுப் பேருந்தில் இளம்பெண் ஒருவர் கூட்டுப் பாலியல் வன்கொடுமை செய்யப்பட்ட கொடூரச் சம்பவம் நாடு முழுவதும் பெரும் அதிர்வலைகளை ஏற்படுத்தியுள்ளது. கடந்த மே 12-ஆம் தேதி இரவு, படுக்கை வசதி கொண்ட (Sleeper Bus) தனியார் பேருந்தில் பயணம் செய்த 30 வயது மதிக்கத்தக்க பெண்ணை, அந்தப் பேருந்தின் ஓட்டுநர் மற்றும் நடத்துநர் ஆகிய இருவரும் வலுக்கட்டாயமாக இழுத்துச் சென்று பாலியல் அத்துமீறலில் ஈடுபட்டுள்ளனர். பேருந்து ஊழியர்களே பாதுகாப்பு அளிக்க வேண்டிய இடத்தில் இத்தகைய அராஜகத்தில் ஈடுபட்டது பொதுமக்களிடையே கடும் கோபத்தை ஏற்படுத்தியுள்ளது.
பாதிக்கப்பட்ட பெண்ணை மாறி மாறி பாலியல் வன்கொடுமை செய்த அந்த காம கொடூரர்கள், அவரை ரத்த வெள்ளத்தில் பேருந்துக்கு வெளியே வீசிவிட்டுத் தப்பிச் சென்றுள்ளனர். உயிருக்குத் துடித்த நிலையில் அந்தப் பெண் அளித்த புகாரின் பேரில், டெல்லி போலீசார் வியாழக்கிழமை (மே 14, 2026) வழக்குப் பதிவு செய்தனர். மருத்துவப் பரிசோதனையில் அந்தப் பெண் கூட்டுப் பாலியல் பலாத்காரம் செய்யப்பட்டது உறுதி செய்யப்பட்டது. இதனைத் தொடர்ந்து தலைமறைவாக முயன்ற ஓட்டுநர் மற்றும் நடத்துநரை போலீசார் அதிரடியாகக் கைது செய்ததோடு, குற்றத்திற்குப் பயன்படுத்தப்பட்ட பேருந்தையும் பறிமுதல் செய்தனர்.
இந்தத் துயரத்தின் நடுவே, பாதிக்கப்பட்ட பெண்ணின் வறுமை நிலை அங்கிருந்த அதிகாரிகளைக் கலங்கச் செய்தது. பலத்த காயமடைந்த அவரை மருத்துவமனையில் தங்கி சிகிச்சை பெறுமாறு மருத்துவர்கள் அறிவுறுத்தினர். ஆனால், “எனது கணவர் காச நோயால் பாதிக்கப்பட்டுள்ளார்; எனக்கு 8, 6, 4 வயதில் மூன்று பெண் குழந்தைகள் உள்ளனர். நான் மருத்துவமனையில் இருந்தால் அவர்களுக்கு யார் உணவளிப்பார்கள்? யார் கவனிப்பார்கள்?” என்று கண்ணீருடன் கேட்ட அந்தப் பெண், மருத்துவமனையில் தங்க மறுத்து வீட்டிலிருந்தே சிகிச்சை பெற்று வருகிறார். தனது வலியையும் தாண்டி பிள்ளைகளின் பசிக்காக அவர் காட்டிய உறுதி நெஞ்சை உலுக்குவதாக உள்ளது.
டெல்லியில் கடந்த காலங்களில் நடந்த ‘நிர்பயா’ பாலியல் வன்கொடுமை சம்பவம் ஒட்டுமொத்த தேசத்தையும் உலுக்கிய நிலையில், மீண்டும் அதே போன்று ஓடும் பேருந்தில் ஒரு பெண் கூட்டுப் பலாத்காரம் செய்யப்பட்டிருப்பது பாதுகாப்பு குறித்த அச்சத்தை அதிகரித்துள்ளது. தனியார் பேருந்துகளில் பயணிக்கும் பெண்களின் பாதுகாப்பு கேள்விக்குறியாகி உள்ள நிலையில், குற்றவாளிகளுக்குக் கடுமையான தண்டனை வழங்க வேண்டும் என்று பல்வேறு தரப்பினரும் கோரிக்கை விடுத்து வருகின்றனர். டெல்லி போலீசார் இந்தச் சம்பவம் தொடர்பாகத் தீவிர விசாரணையைத் தொடர்ந்து வருகின்றனர்.