ஐபிஎல் 2026 தொடரில் குஜராத் டைட்டன்ஸ் மற்றும் ராஜஸ்தான் ராயல்ஸ் அணிகளுக்கு இடையிலான ஆட்டத்தில், 15 வயது இளம் வீரர் வைபவ் சூர்யவன்ஷியின் அதிரடியை முறியடிக்க குஜராத் பயிற்சியாளர் ஆஷிஷ் நெஹ்ரா வகுத்த வியூகம் சமூக வலைதளங்களில் வைரலாகி வருகிறது. ஆட்டத்தின் தொடக்கத்திலேயே முகமது சிராஜ் மற்றும் ககிசோ ரபாடா ஆகியோரின் பந்துவீச்சை சிதறடித்த வைபவ், சிக்ஸர்களைப் பறக்கவிட்டு மைதானத்தை அதிரவைத்தார். அவர் களத்தில் இருந்தவரை ராஜஸ்தான் அணி இமாலய இலக்கை எளிதில் எட்டிவிடும் என்றே தோன்றியது.
இளம் வீரரின் விக்கெட்டை எடுக்கத் திணறிய வேளையில், டக்-அவுட்டில் இருந்த பயிற்சியாளர் ஆஷிஷ் நெஹ்ரா சிராஜிற்கு சில சைகைகளைச் செய்தார். தனது தலையைக் காட்டி “புத்திசாலித்தனமாகச் செயல்படு” என்று சிக்னல் கொடுத்த நெஹ்ரா, பவுன்சர் பந்துகளைப் பயன்படுத்துமாறு அறிவுறுத்தினார். ஒரு அனுபவமிக்க பயிற்சியாளராக அவர் ஆட்டத்தின் போக்கை உணர்ந்து கொடுத்த இந்தத் தெளிவான அறிவுறுத்தல் உடனடியாகப் பலன் தந்தது.
Masterstroke from Ashish Nehra and Mohammed Siraj nails the execution under pressure🙌
Vaibhav Sooryavanshi falls to the trap 🚨#TATAIPL Revenge Week 2026 ➡️ #RRvGT | LIVE NOW 👉 https://t.co/4f0xDg7EfO pic.twitter.com/ApgaLO8b24
— Star Sports (@StarSportsIndia) May 9, 2026
நெஹ்ராவின் ஆலோசனையைப் பின்பற்றி சிராஜ் 146.6 கி.மீ வேகத்தில் ஒரு துல்லியமான பவுன்சரை வீசினார். அதை எதிர்கொள்ள முடியாமல் வைபவ் அடித்த ஷாட் டாப் எட்ஜ் ஆகி அர்ஷத் கானிடம் பிடிபட்டது. 16 பந்துகளில் 36 ரன்கள் எடுத்து ஆபத்தானவராகத் தெரிந்த வைபவ்வை வெளியேற்றியதும், சிராஜ் ஆக்ரோஷமாகக் கொண்டாடி தனது மகிழ்ச்சியை வெளிப்படுத்தினார். நெஹ்ராவின் இந்தத் தந்திரமான நகர்வு குஜராத் அணியின் வெற்றிக்கு முக்கியத் திருப்புமுனையாக அமைந்தது.