தமிழக அரசியல் வரலாற்றில் இதுவரை கண்டிராத ஒரு பரபரப்பான சூழல் தற்போது நிலவி வருகிறது. 2026 சட்டசபை தேர்தல் முடிவுகள் வெளியாகி நான்கு நாட்கள் கடந்தும், ஆட்சி அமைப்பதில் நீடிக்கும் இழுபறி ஒட்டுமொத்த மாநிலத்தையும் உற்றுநோக்க வைத்துள்ளது. 234 தொகுதிகளைக் கொண்ட தமிழகத்தில், 118 என்ற பெரும்பான்மை எண்ணிக்கையை எந்தக் கட்சியும் தனித்து எட்டாத நிலையில், 108 இடங்களை வென்று தனிப்பெரும் கட்சியாக உருவெடுத்துள்ள தமிழக வெற்றிக் கழகத்தின் தலைவர் விஜய், எப்படியாவது ஆட்சியைக் கைப்பற்றிவிட வேண்டும் என்பதில் தீவிர முனைப்பு காட்டி வருகிறார்.
ஆட்சி அமைப்பதற்கான உரிமை கோரி ஏற்கனவே ஆளுநரைச் சந்தித்த விஜய், காங்கிரஸ் கட்சியின் 5 சட்டமன்ற உறுப்பினர்களின் ஆதரவு கடிதங்களைச் சமர்ப்பித்துள்ளார். இருப்பினும், பெரும்பான்மையை நிரூபிக்க இன்னும் 5 உறுப்பினர்களின் ஆதரவு தேவைப்படுவதால், ஆளுநர் ஆர்.வி.அர்லேகர் உடனடியாகப் பச்சைக்கொடி காட்ட மறுத்துவிட்டார். “தேவையான ஆதரவு இல்லாமல் ஆட்சி அமைக்க அழைக்க முடியாது” என்ற ஆளுநரின் கறாரான நிலைப்பாடு, தவெக முகாமை தற்போது கூட்டணிப் பேச்சுவார்த்தைகளை நோக்கி நகர்த்தியுள்ளது. குறிப்பாக, திமுக கூட்டணியில் உள்ள கட்சிகளைத் தன் பக்கம் இழுக்கும் முயற்சியில் விஜய் தரப்பு இறங்கியிருப்பது அரசியல் களத்தில் பெரும் அதிர்வலைகளை ஏற்படுத்தியுள்ளது.
தவெக துணைப் பொதுச் செயலாளர் சி.டி.ஆர். நிர்மல்குமார் தலைமையிலான குழுவினர், இந்திய கம்யூனிஸ்ட் மற்றும் மார்க்சிஸ்ட் கம்யூனிஸ்ட் கட்சிகளின் மாநிலச் செயலாளர்களை நேரில் சந்தித்து ஆதரவு கோரியுள்ளனர். “ஆட்சியிலும் அதிகாரத்திலும் பங்கு” என்ற கவர்ச்சிகரமான வாக்குறுதியை முன்வைத்து, மற்ற கட்சிகளுடன் திரைமறைவு பேச்சுவார்த்தைகள் விறுவிறுப்பாக நடைபெற்று வருகின்றன. இருப்பினும், “திமுகவின் முடிவே எங்களது முடிவு” என இந்திய யூனியன் முஸ்லிம் லீக் போன்ற கட்சிகள் உறுதியாகத் தெரிவித்துள்ளதால், கூட்டணிக்குள் ஒரு பிளவை ஏற்படுத்துவது விஜய்க்கு பெரும் சவாலாகவே உள்ளது.
அடுத்த சில மணி நேரங்களில் எட்டப்படும் முடிவுகளே தமிழகத்தின் எதிர்காலத்தைத் தீர்மானிக்கப் போகின்றன. விஜய் தேவையான 118 எம்.எல்.ஏ-க்களின் ஆதரவைத் திரட்டி முதலமைச்சராகப் பதவியேற்பாரா அல்லது எந்தக் கட்சியும் பெரும்பான்மையை நிரூபிக்க முடியாத சூழலில் தமிழகம் குடியரசுத் தலைவர் ஆட்சியின் கீழ் செல்லுமா என்பது மில்லியன் டாலர் கேள்வியாக உருவெடுத்துள்ளது. சட்ட ரீதியான ஆவணங்கள் மற்றும் அரசியல் சாசன விளக்கங்களுடன் விஜய் மீண்டும் ஆளுநரைச் சந்திக்கத் தயாராகி வருவதால், கோட்டை நோக்கிப் பயணிப்பவர் யார் என்பது விரைவில் தெரிந்துவிடும்.