தமிழக அரசியலில் தற்போதைய பரபரப்பான சூழலில், விடுதலைச் சிறுத்தைகள் கட்சியின் பொதுச்செயலாளர் சிந்தனைச் செல்வன் தனது முகநூல் பதிவின் மூலம் புதிய விவாதத்தைத் தொடங்கி வைத்துள்ளார். திராவிடக் கட்சிகள் அனைத்தும் ஒன்றிணைந்து தொல். திருமாவளவனை முதல்வர் வேட்பாளராக முன்னிறுத்த வேண்டும் என்று அவர் வலியுறுத்தியுள்ள விவகாரம் அரசியல் களத்தில் பெரும் அதிர்வலைகளை ஏற்படுத்தியுள்ளது.
குறிப்பாக, நடிகர் விஜய்யின் அரசியல் வருகை குறித்து விமர்சித்துள்ள அவர், இது வெறும் ரசிக மனோபாவத்தால் உருவான ஒரு ‘ஜென்சி’ (Gen Z) அலைதானே தவிர, இதில் எவ்வித அர்த்தமுள்ள அரசியல் பிரளயமும் இல்லை என்று நேரடியாகத் தாக்கியுள்ளார். விஜய் தனது அரசியல் பயணத்தைத் தொடங்கி ஆட்சி அமைப்பதற்கான வாய்ப்புகள் தாமதமாகும் சூழலில், திருமாவளவனை மையப்படுத்தி சிந்தனைச் செல்வன் முன்வைத்துள்ள இந்தக் கருத்து, தமிழக அரசியலில் ஒரு எதிர்பாராத திருப்பமாகவும், புதிய அதிகாரப் பகிர்வுக்கான கோரிக்கையாகவும் பார்க்கப்படுகிறது.