“ஜாக்கோ ரகே சையன், மார் சகே நா கோயி” என்ற பழமொழிக்கேற்ப, மரணத்தின் பிடியிலிருந்து இரண்டு முறை மீண்டு வந்து உலகையே வியப்பில் ஆழ்த்தியுள்ளார் 28 வயதான ஹிந்தா ஆபிரகாம்ஸ். ஜனவரி 30 அன்று லேசான வயிற்று வலியுடன் மருத்துவமனைக்குச் சென்ற இவருக்கு, உயிருக்கே ஆபத்தான ‘எக்டோபிக் பிரக்னன்சி’ (கருப்பைக்கு வெளியே கரு வளருதல்) இருப்பது கண்டறியப்பட்டது. இதற்காக மேற்கொள்ளப்பட்ட 45 நிமிட சாதாரண அறுவை சிகிச்சையின் போது, மயக்க மருந்து ஒவ்வாமையால் இவரது இதயம் திடீரென நின்றது. சுமார் 20 வினாடிகள் மருத்துவ ரீதியாக இறந்த நிலைக்குச் சென்ற ஹிந்தாவை, மருத்துவர்கள் போராடி மீண்டும் உயிர்ப்பித்தனர்.
அறுவை சிகிச்சைக்குப் பிறகு கண்விழித்த ஹிந்தா, தான் தீவிர சிகிச்சைப் பிரிவில் இயந்திரங்களின் உதவியுடன் சுவாசிப்பதைக் கண்டு அதிர்ச்சியடைந்தார். தனக்கு ஒருமுறை அல்ல, இரண்டு முறை மாரடைப்பு ஏற்பட்டதையும், மருத்துவர்கள் சிபிஆர் (CPR) மூலம் தன்னை மரணத்தின் விளிம்பிலிருந்து மீட்டெடுத்ததையும் அவர் அறிந்து கொண்டார். மருத்துவ அறிவியலின்படி, இத்தகைய சூழலில் உயிர் பிழைப்பதற்கான வாய்ப்புகள் மிகக் குறைவு என்பதோடு, மூளை பாதிப்பு ஏற்படும் அபாயமும் அதிகம். ஆனால், நிமோனியா மற்றும் இதய செயலிழப்பு போன்ற சவால்களையும் முறியடித்து, எவ்வித பாதிப்புமின்றி அவர் மீண்டு வந்தது ஒரு மருத்துவ அதிசயமாகக் கருதப்படுகிறது.
தற்போது தனது கணவர் மற்றும் இரண்டு குழந்தைகளுடன் ஆரோக்கியமாக வாழ்ந்து வரும் ஹிந்தா, தனது அனுபவத்தின் மூலம் பெண்களுக்கு விழிப்புணர்வை ஏற்படுத்தி வருகிறார். மருத்துவமனைகளில் பரிந்துரைக்கப்படும் கர்ப்பப் பரிசோதனைகள் மற்றும் இதர சோதனைகளை ஒருபோதும் அலட்சியப்படுத்தக் கூடாது என்பதே இவரது பிரதான கோரிக்கையாக உள்ளது. சரியான நேரத்தில் மேற்கொள்ளப்பட்ட மருத்துவப் பரிசோதனைகளே இன்று தன்னை உயிரோடு வைத்திருப்பதாகக் கூறும் ஹிந்தா, தனக்குக் கிடைத்த இந்த மறுபிறவியின் ஒவ்வொரு நொடியையும் ஒரு வரமாகக் கருதி மகிழ்ச்சியுடன் வாழ்ந்து வருகிறார்.