2026 தமிழக சட்டமன்றத் தேர்தல் முடிவுகள் தமிழக அரசியல் வரலாற்றில் ஒரு மிகப்பெரிய திருப்புமுனையை ஏற்படுத்தியுள்ளன. பல தசாப்தங்களாக திராவிடக் கட்சிகள் மட்டுமே மாறி மாறி ஆட்சி செய்து வந்த நிலையில், தமிழக வெற்றிக் கழகம் 108 தொகுதிகளில் வெற்றி பெற்று தனிப்பெரும் கட்சியாக உருவெடுத்துள்ளது, ஒரு புதிய அரசியல் மாற்றத்திற்கான விதையாகப் பார்க்கப்படுகிறது. இருப்பினும், ஆட்சி அமைக்கத் தேவையான 118 இடங்களை எந்தக் கட்சியும் எட்டாததால், தமிழகத்தில் “தொங்கு சட்டசபை” என்ற சூழல் உருவாகியுள்ளது. இது தமிழக அரசியலில் இதுவரை கண்டிராத ஒரு புதிய சவாலை தவெக தலைவர் விஜய்க்கு ஏற்படுத்தியுள்ளது.
இந்த இக்கட்டான அரசியல் சூழலில், தமிழக பாஜகவின் முன்னாள் தலைவர் அண்ணாமலை கடந்த 2024-ஆம் ஆண்டே பேசிய ஒரு வீடியோ தற்போது சமூக வலைதளங்களில் தீயாய் பரவி வருகிறது. அதில், “2026 தேர்தலில் தமிழகத்தில் எந்த ஒரு கட்சியும் தனித்து ஆட்சி அமைக்க முடியாது, 100 சதவீதம் கூட்டணி ஆட்சிதான் அமையும்” என்று அவர் துல்லியமாகக் கணித்திருந்தார். தற்போதுள்ள நிலவரம் அண்ணாமலை அன்று சொன்னதை அப்படியே பிரதிபலிப்பதாக அவரது ஆதரவாளர்கள் மற்றும் அரசியல் விமர்சகர்கள் சுட்டிக்காட்டுகின்றனர். விஜய்யின் கட்சி பெரும்பான்மைக்கு இன்னும் 10 இடங்கள் தேவைப்படும் நிலையில், கூட்டணி ஆட்சி என்ற அண்ணாமலையின் கணிப்பு நிஜமாகியுள்ளது.
தற்போதுள்ள சட்டமன்றத்தின் பதவிக்காலம் மே 10-ஆம் தேதியுடன் முடிவடைவதால், அதற்குள் புதிய அரசு அமைய வேண்டிய கட்டாயம் உள்ளது. 108 இடங்களை வைத்துள்ள விஜய், மீதமுள்ள 10 உறுப்பினர்களின் ஆதரவைப் பெற காங்கிரஸ், இடதுசாரிகள் மற்றும் பிற சிறிய கட்சிகளுடன் தீவிரப் பேச்சுவார்த்தையில் ஈடுபட்டுள்ளதாகத் தகவல்கள் தெரிவிக்கின்றன. அதேசமயம், ஆளுநர் தவெக-வை ஆட்சி அமைக்க அழைத்து, பின்னர் 15 நாட்களில் பெரும்பான்மையை நிரூபிக்க உத்தரவிடும் வாய்ப்பும் உள்ளது. எது எப்படியிருப்பினும், தமிழகம் இப்போது ஒரு கூட்டணி ஆட்சியை நோக்கியே நகர்ந்து கொண்டிருக்கிறது என்பது உறுதியாகியுள்ளது.
அண்ணாமலையின் கணிப்பு ஒருபுறம் உண்மையானாலும், அவர் தனது கட்சிக்காக முன்வைத்த இரண்டாவது வாய்ப்பு பலிக்கவில்லை என்பது குறிப்பிடத்தக்கது. பாஜக முன்கூட்டியே வேட்பாளர்களை அறிவித்து கடுமையாக உழைத்தால் தவிர்க்க முடியாத சக்தியாக மாறும் என்று அவர் குறிப்பிட்டிருந்தார். ஆனால், தேர்தல் முடிவுகளில் பாஜக பெரும் பின்னடைவைச் சந்தித்துள்ளது. இதன் மூலம், தமிழக மக்கள் மாற்றத்தை விரும்பினாலும், அது யாருக்கானது என்பதில் மிகத் தெளிவான முடிவை எடுத்துள்ளதை இந்தத் தேர்தல் முடிவுகள் காட்டுகின்றன. இப்போது ஒட்டுமொத்த தமிழகத்தின் பார்வையும் ஆளுநர் மாளிகை மற்றும் விஜய்யின் அடுத்தகட்ட நகர்வின் மீதே உள்ளது.