தமிழ்நாட்டில் இன்று ஆபரணத் தங்கத்தின் விலை அதிரடியாகக் குறைந்துள்ளதால் நகைப்பிரியர்கள் மகிழ்ச்சி அடைந்துள்ளனர். 22 கேரட் ஆபரணத் தங்கத்தின் விலை சவரனுக்கு ரூ.1,440 குறைந்து, ஒரு சவரன் ரூ.1,10,560-க்கு விற்பனை செய்யப்படுகிறது. நேற்று (மே 04) ஒரு சவரன் தங்கம் ரூ.1,12,000-க்கு விற்பனையான நிலையில், இன்றைய இந்த விலைக்குறைவு இல்லத்தரசிகளுக்குச் சற்று நிம்மதியை அளித்துள்ளது.
தங்கத்தின் கிராம் விலையிலும் குறிப்பிடத்தக்க சரிவு காணப்படுகிறது. நேற்று ஒரு கிராம் தங்கம் ரூ.14,000-க்கு விற்பனை செய்யப்பட்ட நிலையில், இன்று கிராமுக்கு ரூ.180 குறைந்து, ரூ.13,820-க்கு விற்பனையாகிறது. கடந்த சில நாட்களாகத் தொடர்ந்து ஏறுமுகமாக இருந்த தங்கத்தின் விலை, தற்போது குறையத் தொடங்கியுள்ளது நகை வாங்கக் காத்திருப்போருக்கு ஒரு நல்வாய்ப்பாகக் கருதப்படுகிறது.