தமிழக சட்டமன்ற தேர்தல் 2026-ன் முடிவுகள் ஒட்டுமொத்த அரசியல் களத்தையும் அதிரவைத்துள்ளன. குறிப்பாக, சென்னையின் பாரம்பரிய தொகுதியான ராயபுரத்தில் தமிழக வெற்றிக் கழகத்தின் (தவெக) வேட்பாளராகக் களமிறங்கிய ஆட்டோ ஓட்டுநர் விஜய் தாமு, பெரும் ஜாம்பவான்களை வீழ்த்தி அமோக வெற்றி பெற்றுள்ளார். வாக்கு எண்ணிக்கை தொடங்கிய முதல் சுற்றிலிருந்தே முன்னிலை வகித்த இவர், இறுதிச் சுற்றின் முடிவில் மொத்தம் 58,827 வாக்குகள் பெற்று வெற்றி வாகை சூடினார். இவரை எதிர்த்துப் போட்டியிட்ட திமுக வேட்பாளர் சுபைர் கான் 44,698 வாக்குகள் பெற்று இரண்டாம் இடத்தைப் பிடித்தார்.
இந்தத் தேர்தலின் மிகப்பெரிய அதிர்ச்சியாக, அதிமுகவின் மூத்த தலைவரும், முன்னாள் சபாநாயகருமான டி.ஜெயக்குமார் படுதோல்வியைச் சந்தித்துள்ளார். கடந்த காலங்களில் ஐந்து முறை இதே தொகுதியில் வெற்றி பெற்று கோலோச்சிய அவர், இந்த முறை வெறும் 18,285 வாக்குகள் மட்டுமே பெற்று டெபாசிட் இழந்துள்ளார். ராயபுரம் தொகுதி அதிமுகவின் கோட்டையாகக் கருதப்பட்ட நிலையில், அந்த மண்ணின் மைந்தராக அறியப்பட்ட ஜெயக்குமாரின் இந்தத் தோல்வி அக்கட்சித் தொண்டர்களிடையே பெரும் அதிர்ச்சியை ஏற்படுத்தியுள்ளது.
ராயபுரம் மட்டுமின்றி, தலைநகர் சென்னையின் ஒட்டுமொத்த தேர்தல் முடிவுகளும் திமுக மற்றும் அதிமுக ஆகிய இரு திராவிடக் கட்சிகளுக்கும் பெரும் பின்னடைவாக அமைந்துள்ளன. சென்னையில் உள்ள மொத்தம் 16 தொகுதிகளில், துறைமுகம் தொகுதியில் அமைச்சர் சேகர்பாபு மற்றும் சேப்பாக்கம்-திருவல்லிக்கேணி தொகுதியில் துணை முதல்வர் உதயநிதி ஸ்டாலின் ஆகியோர் மட்டுமே வெற்றி பெற்று திமுகவின் மானத்தைக் காத்துள்ளனர். மற்ற அனைத்து தொகுதிகளிலும் தவெக வேட்பாளர்கள் ஆதிக்கம் செலுத்தி வெற்றியைத் தட்டிச் சென்றுள்ளனர்.
இந்தத் தேர்தலின் உச்சகட்ட திருப்பமாக, கொளத்தூர் தொகுதியில் போட்டியிட்ட தமிழக முதல்வர் மு.க. ஸ்டாலின், தவெக வேட்பாளர் வி.எஸ். பாபுவிடம் தோல்வியடைந்தது அரசியல் வட்டாரத்தில் பேரிடியாகப் பார்க்கப்படுகிறது. எளிய பின்னணி கொண்ட வேட்பாளர்களைக் களமிறக்கிய தமிழக வெற்றிக் கழகத்தின் வியூகம், குறிப்பாகச் சென்னை மற்றும் அதன் சுற்றுவட்டாரப் பகுதிகளில் மிகப்பெரிய மாற்றத்தை ஏற்படுத்தியுள்ளது. ஆட்டோ ஓட்டுநர் முதல் சாதாரணத் தொண்டர்கள் வரை சட்டமன்ற உறுப்பினர்களாக உருவெடுத்துள்ளது தமிழக அரசியலில் புதிய சகாப்தத்தை உணர்த்துகிறது.