உத்தரப் பிரதேச மாநிலம் ஜான்பூரில் திருமண ஊர்வலத்தின் போது மணமகன் சுட்டுக் கொல்லப்பட்ட சம்பவம் பெரும் அதிர்ச்சியை ஏற்படுத்தியுள்ளது. ஆசாத் பிந்த் என்ற இளைஞர் தனது திருமணத்திற்காக மணமகள் வீட்டிற்கு காரில் சென்று கொண்டிருந்தபோது, அப்பாச்சி பைக்கில் வந்த இருவர் சினிமா பாணியில் அவரை வழிமறித்து துப்பாக்கியால் சுட்டனர். பலத்த காயமடைந்த ஆசாத் மருத்துவமனைக்குக் கொண்டு செல்லும் வழியிலேயே உயிரிழந்தார். இந்தத் துயரச் சம்பவத்தால் மேளதாளங்கள் முழங்க மகிழ்ச்சியாகத் தொடங்கிய திருமண வீடு, சில நிமிடங்களிலேயே மரண ஓலத்துடன் சோகத்தில் மூழ்கியது.
இந்தக் கொலை குறித்து தீவிர விசாரணை நடத்திய ஜான்பூர் காவல்துறையினர், சில மணி நேரங்களிலேயே கொலையாளிகளைக் கண்டறிந்தனர். மணமகள் சோனி பிந்தின் உறவினரான பிரதீப் பிந்த் என்பவரே தனது நண்பர் ரவி யாதவுடன் சேர்ந்து இந்தத் துணிகரக் கொலையைச் செய்தது உறுதியானது. இந்தத் திருமணத்தில் பிரதீப் பிந்திற்கு உடன்பாடு இல்லை என்றும், எப்படியாவது திருமணத்தை நிறுத்திவிட வேண்டும் என்ற வன்மத்திலுமே அவர் இந்தத் திட்டத்தைத் தீட்டியதும் விசாரணையில் தெரியவந்துள்ளது. செல்போன் அழைப்பு விவரங்கள் மற்றும் சிசிடிவி காட்சிகளின் அடிப்படையில் காவல்துறையினர் இந்த மர்மத்தை உடைத்துள்ளனர்.
தற்போது தப்பியோடியுள்ள பிரதீப் பிந்த் மற்றும் ரவி யாதவ் ஆகியோரைத் தேடும் பணியில் பல தனிப்படைகள் அமைக்கப்பட்டுள்ளதாகக் காவல் கண்காணிப்பாளர் குன்வர் அனுபம் சிங் தெரிவித்துள்ளார். “நிச்சயிக்கப்பட்ட பெண்ணின் உறவினருக்குத் திருமணத்தில் அதிருப்தி இருந்ததே இந்தக் கொலைக்குக் காரணம். குற்றவாளிகள் மீது கடுமையான சட்ட நடவடிக்கை எடுக்கப்படும்” என அவர் உறுதி அளித்துள்ளார். மணக்கோலத்தில் இருந்த மணமகன் பிணமாக மீட்கப்பட்ட சம்பவம் அப்பகுதி மக்களிடையே பெரும் கொந்தளிப்பையும் அச்சத்தையும் ஏற்படுத்தியுள்ளது.