2026-ஆம் ஆண்டுக்கான புதிய வருமான வரி விதிகளின்படி, அஞ்சலகங்களில் மேற்கொள்ளப்படும் முக்கிய பணப்பரிவர்த்தனைகளுக்கு நிரந்தர கணக்கு எண் (PAN) வழங்குவது இனி கட்டாயமாக்கப்பட்டுள்ளது. ஏப்ரல் 1, 2026 முதல் அமலுக்கு வந்துள்ள இந்த மாற்றத்தின்படி, புதிய கணக்கு தொடங்குதல், பணம் டெபாசிட் செய்தல் மற்றும் கால வைப்புத் தொகை (Time Deposits) போன்ற அனைத்து சேவைகளுக்கும் பான் கார்டு எண் அளிப்பது அவசியமாகும். ஒருவேளை பான் கார்டு இல்லாத முதலீட்டாளர்கள், பழைய படிவம் 60-க்கு மாற்றாகக் கொண்டுவரப்பட்டுள்ள புதிய ‘படிவம் 97’-ஐப் பூர்த்தி செய்து வழங்க வேண்டும்.
அஞ்சலக வட்டி வருமானத்தில் வரி பிடித்தத்தைத் (TDS) தவிர்க்க விரும்புவோருக்கு ஒரு முக்கிய மாற்றமாக, இதுவரை நடைமுறையில் இருந்த 15G மற்றும் 15H படிவங்களுக்குப் பதிலாக ‘படிவம் 121’ அறிமுகப்படுத்தப்பட்டுள்ளது. வரி செலுத்துவோர் தங்களின் ஆண்டு வருமானம் வரி வரம்பிற்குள் வராது என்பதற்கான உறுதிமொழியை இந்தப் படிவம் மூலம் வழங்கலாம். ஒவ்வொரு நிதியாண்டின் தொடக்கத்திலும் இதனைச் சமர்ப்பிப்பது அவசியமாகும்; இருப்பினும், தொழில்நுட்ப மேம்பாடுகள் முழுமையடையும் வரை தற்காலிகமாகப் பழைய படிவங்களும் புழக்கத்தில் இருக்கும் என அறிவிக்கப்பட்டுள்ளது.
இந்த விவரங்களை வருமான வரித் துறைக்குத் தாக்கல் செய்ய அஞ்சலகங்களுக்குத் துல்லியமான காலக்கெடு நிர்ணயிக்கப்பட்டுள்ளது. செப்டம்பர் மாதம் வரை பெறப்படும் படிவங்கள் அக்டோபர் 31-க்குள்ளும், மார்ச் மாதம் வரை பெறப்படுபவை ஏப்ரல் 30-க்குள்ளும் அறிக்கையாகத் தாக்கல் செய்யப்பட வேண்டும். வாடிக்கையாளர்கள் தங்களின் முதலீடுகள் மற்றும் பணப்பரிவர்த்தனைகளில் எவ்விதத் தடையுமின்றிச் செயல்பட, இந்த புதிய வரி விதிமுறைகளையும் காலக்கெடுவையும் முறையாகப் பின்பற்றுமாறு அறிவுறுத்தப்படுகிறார்கள்.