தமிழகச் சட்டமன்றத் தேர்தல் கடந்த 23-ஆம் தேதி நடந்து முடிந்துள்ள நிலையில், ஒட்டுமொத்த மாநிலத்தின் பார்வையும் மே 4-ஆம் தேதி வெளியாகவுள்ள தேர்தல் முடிவுகளை நோக்கியே இருக்கிறது. ஆட்சியைத் தக்கவைக்க திமுகவும், மீண்டும் அரியணையைக் கைப்பற்ற அதிமுகவும் மல்லுக்கட்டும் வேளையில், நாம் தமிழர் மற்றும் தமிழக வெற்றிக் கழகம் ஆகிய கட்சிகளும் பலப்பரீட்சையில் இறங்கியுள்ளன. இன்று மாலை வாக்குப்பதிவுக்குப் பிந்தைய கருத்துக்கணிப்புகள் வெளியாக உள்ள சூழலில், பிரபல ஜோதிடர் ஷெல்வீ தமிழகத்தின் முக்கிய அரசியல் தலைவர்களின் ஜாதக நிலவரங்களை அலசி யாருக்கு வெற்றி வாய்ப்பு அதிகம் என்பது குறித்துத் தனது கணிப்புகளைப் பகிர்ந்துள்ளார்.
ஜோதிடர் ஷெல்வீயின் கணிப்புப்படி, இந்தத் தேர்தலில் தனிநபர் செல்வாக்கை விடக் கூட்டணி பலமே வெற்றியைத் தீர்மானிக்கும் காரணியாக இருக்கும். முதலாவதாகக் கூட்டணி அமைத்துக் களமிறங்கியவர்களுக்கு முன்னிலை உண்டு என்றும், கடைசி நேரத்தில் முடிவெடுத்தவர்களுக்குச் சிரமம் நிலவும் என்றும் அவர் குறிப்பிட்டுள்ளார். குறிப்பாக, விஜய் மற்றும் அண்ணாமலை ஆகிய இருவரும் கடக ராசியைச் சேர்ந்தவர்கள் என்பதால், அவர்களின் வருகை தேர்தலில் பெரும் தாக்கத்தை ஏற்படுத்தும். இதில் விஜய்யின் ஜாதகம் மிகவும் வலிமையாக இருந்தாலும், அவருக்கு உடன் இருப்பவர்களின் ஒத்துழைப்பு எந்தளவுக்குக் கிடைக்கும் என்பது கேள்விக்குறியே என அவர் தெரிவித்துள்ளார்.
திமுக தரப்பைப் பொறுத்தவரை, முதலமைச்சர் ஸ்டாலின் சிம்ம ராசிக்காரர் என்றும், உதயநிதி ஸ்டாலின் ரிஷப ராசிக்காரர் என்றும் குறிப்பிட்ட ஷெல்வீ, உதயநிதிக்கு ராகு புத்தி மாறி குரு புத்தி தொடங்கியிருப்பது அவருக்குப் பெரும் வலிமையைத் தரும் எனக் கூறியுள்ளார். இது ஸ்டாலினுக்கும் கூடுதல் பலமாக அமையும். அதே சமயம், அதிமுக பொதுச்செயலாளர் எடப்பாடி பழனிசாமி கன்னி ராசிக்காரர் என்பதால், அவருக்கு மே மாத குருபெயர்ச்சிக்குப் பிறகே சாதகமான சூழல் அமையும் என்றும், பத்தாம் இடத்தில் இருக்கும் குரு பதவியைப் பறிக்க முயல்வார் என்பதால் அவர் எச்சரிக்கையுடன் செயல்பட வேண்டும் என்றும் ஜோதிடர் அறிவுறுத்தியுள்ளார்.
இறுதியாக, இந்தத் தேர்தலின் முடிவுகளைத் தீர்மானிப்பதில் விஜய் பிரிக்கப்போகும் வாக்குகள் முக்கியத் திருப்பமாக அமையும் என ஜோதிடர் கணித்துள்ளார். விஜய் மற்றும் உதயநிதி ஆகிய இருவருக்குமே ‘நீச்சபங்க ராஜயோகம்’ இருப்பதால் இவர்களை எளிதாக எடைபோட முடியாது என்றும், விஜய்க்குப் புரட்டாசி மாதத்திலிருந்தே நல்ல காலம் தொடங்கிவிட்டதாகவும் அவர் கூறியுள்ளார். சீமானுக்கு பழையபடி வாக்குகள் கிடைப்பது சந்தேகம் எனக் குறிப்பிட்டுள்ள அவர், திமுக கூட்டணி அசுர பலத்துடன் இருந்தாலும், பாஜகவின் கிரக நிலைகள் இந்த முறை அதிமுகவுக்குச் சாதகமான சில மாற்றங்களை உருவாக்கும் என்றும் தனது கணிப்பை நிறைவு செய்துள்ளார்.