2026 தமிழக சட்டமன்றத் தேர்தல் களம் சூடுபிடித்துள்ள நிலையில், தமிழக வெற்றிக் கழகம் (தவெக) குறித்த பல்வேறு தகவல்கள் சமூக வலைதளங்களில் புயலைக் கிளப்பி வருகின்றன. குறிப்பாக, பெரம்பூர் மற்றும் திருச்சி கிழக்கு ஆகிய இரு தொகுதிகளிலும் அக்கட்சியின் தலைவர் விஜய் களம் இறங்கியுள்ள நிலையில், அந்த இடங்கள் உட்பட மொத்தம் 65 தொகுதிகளில் தவெக நிச்சயம் வெற்றிபெறும் என்றும், முதல்வர் ஸ்டாலின் போட்டியிடும் கொளத்தூர் தொகுதியில் அவரது வெற்றிவாய்ப்பு பறிபோய்விட்டதாகவும் ஒரு பதிவு வைரலாகி வருகிறது. இது தவெகவினரால் பகிரப்பட்டதா என்பது குறித்து அதிகாரப்பூர்வ தகவல்கள் இல்லை என்றாலும், அக்கட்சித் தொண்டர்களிடையே இது உற்சாகத்தை ஏற்படுத்தியுள்ளது.
அதேசமயம், சமீபத்தில் வெளியான தவெகவின் உத்தேச அமைச்சரவை பட்டியல் குறித்த பதிவை, கட்சியின் முக்கிய நிர்வாகியான சி.டி.ஆர். நிர்மல் குமார் திட்டவட்டமாக மறுத்துள்ளார். இத்தகைய போலிப் பட்டியல்கள் எதிர்க்கட்சிகளால் திட்டமிட்டு பரப்பப்படும் சதி என்றும், மக்கள் மத்தியில் குழப்பத்தை ஏற்படுத்தவே இத்தகைய செயல்கள் அரங்கேற்றப்படுகின்றன என்றும் அவர் விளக்கம் அளித்துள்ளார். அரசியல் களத்தில் தவெகவின் வருகை ஏற்படுத்தியுள்ள அதிர்வலைகளே இத்தகைய விவாதங்களுக்கும், வதந்திகளுக்கும் முதன்மைக் காரணமாகப் பார்க்கப்படுகிறது.