சென்னை அண்ணா பல்கலைக்கழக வாக்கு எண்ணும் மையத்தின் சிசிடிவி கட்டுப்பாட்டு அறையில் அமர்ந்து, சட்டவிரோதமாகத் திரைப்படம் பார்த்த ஒப்பந்த ஊழியர் யுவராஜ் என்பவர் கைது செய்யப்பட்டுள்ளார். கட்டுப்பாட்டு அறையில் இருந்த கணினியில் ‘ஜனநாயகன்’ திரைப்படத்தைப் பார்த்ததுடன், அதனைப் புகைப்படம் எடுத்து “ஓட்டுப் பெட்டி வர இடத்துல கூட நம்ம தளபதி என்ட்ரி தான்” என்ற வாசகத்துடன் சமூக வலைதளத்தில் அவர் பகிர்ந்துள்ளார்.
இந்த விவகாரம் சமூக வலைதளங்களில் வேகமாகப் பரவியதை அடுத்து, பாதுகாப்புப் பணியில் இருந்த போலீசார் மற்றும் தேர்தல் அதிகாரிகள் அதிர்ச்சியடைந்தனர். மிக முக்கியமான பாதுகாப்பு மண்டலத்தில் அஜாக்கிரதையாகச் செயல்பட்டு, விதிமுறைகளை மீறியதற்காக யுவராஜை போலீசார் கைது செய்து தீவிர விசாரணை நடத்தி வருகின்றனர். வாக்கு எண்ணும் மையத்தின் பாதுகாப்பில் ஏற்பட்ட இந்தச் சிறு குளறுபடி அரசியல் வட்டாரத்தில் பெரும் பரபரப்பை ஏற்படுத்தியுள்ளது.