சென்னை சுங்கவரித் துறை (Chennai Customs) அலுவலகத்தில் உள்ள மெரைன் பிரிவில் காலியாக உள்ள 10 பணியிடங்களை நிரப்புவதற்கான வேலைவாய்ப்பு அறிவிப்பு வெளியிடப்பட்டுள்ளது. சுங்கவரி ஆணையர் அலுவலகத்தில் ‘குரூப் சி’ பிரிவின் கீழ் வரும் டிரேட்ஸ்மேன் (Tradesman), சீமேன் (Seaman) மற்றும் கிரீசர் (Greaser) ஆகிய பணியிடங்களுக்குத் தகுதியானவர்களிடமிருந்து விண்ணப்பங்கள் வரவேற்கப்படுகின்றன. மொத்தம் உள்ள 10 காலியிடங்களில் சீமேன் பணிக்கு 6 இடங்களும், டிரேட்ஸ்மேன் மற்றும் கிரீசர் பணிகளுக்குத் தலா 2 இடங்களும் ஒதுக்கப்பட்டுள்ளன.
இப்பணிகளுக்கான கல்வித் தகுதியைப் பொறுத்தவரை, டிரேட்ஸ்மேன் பதவிக்கு பத்தாம் வகுப்பு தேர்ச்சியுடன் மெக்கானிக், டீசல், பிட்டர் அல்லது வெல்டர் போன்ற பிரிவுகளில் ஐடிஐ (ITI) முடித்திருக்க வேண்டும். சீமேன் மற்றும் கிரீசர் பணிகளுக்கு பத்தாம் வகுப்பு தேர்ச்சியுடன், கடல்சார் இயந்திரக் கலன்களில் (Mechanized Vessels) குறைந்தது மூன்று ஆண்டுகள் பணியாற்றிய அனுபவம் பெற்றிருப்பது அவசியமாகும். விண்ணப்பதாரர்கள் 18 முதல் 25 வயதிற்கு உட்பட்டவராக இருக்க வேண்டும்; இருப்பினும் அரசு விதிமுறைப்படி வயது வரம்பில் தளர்வுகள் உண்டு.
தேர்வு செய்யப்படும் விண்ணப்பதாரர்களுக்குத் தரம் வாரியாக ஊதியம் வழங்கப்படும். டிரேட்ஸ்மேன் பணிக்கு மாதம் ரூ.19,900 முதல் ரூ.63,200 வரையிலும், சீமேன் மற்றும் கிரீசர் பணிகளுக்கு ரூ.18,000 முதல் ரூ.56,900 வரையிலும் ஊதியம் நிர்ணயிக்கப்பட்டுள்ளது. தகுதியுள்ள நபர்கள் பூர்த்தி செய்யப்பட்ட விண்ணப்பங்களை உரிய ஆவணங்களுடன் இணைத்து, வரும் ஏப்ரல் 30, 2026-க்குள் சென்னை சுங்கவரித் துறை அலுவலக முகவரிக்கு ஆஃப்லைன் (Offline) முறையில் அனுப்பி வைக்க வேண்டும். விரிவான விவரங்களை https://chennaicustoms.gov.in என்ற அதிகாரப்பூர்வ இணையதளத்தில் தெரிந்து கொள்ளலாம்.