தமிழக சட்டமன்ற தேர்தல் கடந்த 23-ஆம் தேதி நடந்து முடிந்துள்ள நிலையில், வாக்கு எண்ணிக்கைக்காக ஒட்டுமொத்த மாநிலமும் ஆவலுடன் காத்திருக்கிறது. ஆட்சியைத் தக்கவைக்க திமுகவும், மீண்டும் அரியணையை ஏறுவதற்கு அதிமுகவும் மல்லுக்கட்டும் நிலையில், நாம் தமிழர் கட்சி மற்றும் முதன்முறையாகக் களமிறங்கியுள்ள தமிழக வெற்றிக் கழகம் (தவெக) ஆகியவை இத்தேர்தலில் மிகப்பெரிய திருப்புமுனையை ஏற்படுத்தும் என எதிர்பார்க்கப்படுகிறது. குறிப்பாக, நடிகர் விஜய்யின் வருகை இளைஞர்கள் மற்றும் புதிய வாக்காளர்கள் மத்தியில் பெரும் தாக்கத்தை ஏற்படுத்தியுள்ளதாக அரசியல் விமர்சகர்கள் கருதுகின்றனர்.
சென்னையில் செய்தியாளர்களைச் சந்தித்த தவெக தேர்தல் பிரிவு பொதுச்செயலாளர் ஆதவ் அர்ஜுனா, ஆளுங்கட்சியான திமுக மீது கடுமையான புகார்களை முன்வைத்தார். திமுக தரப்பில் ஓட்டுக்கு 5,000 ரூபாய் வரை வழங்கப்பட்டதாகக் குற்றம் சாட்டிய அவர், மக்கள் அந்தப் பணத்தைப் புறக்கணித்துவிட்டு மாற்றத்திற்குத் தயாராகிவிட்டதாகத் தெரிவித்தார். தவெக எந்தவித பண விநியோகத்திலும் ஈடுபடாமல், மக்களாட்சித் தத்துவத்தின்படி நேர்மையான முறையில் தேர்தலைச் சந்தித்துள்ளதாகவும், இது ஒரு ஜனநாயகப் புரட்சியாக அமையும் என்றும் அவர் நம்பிக்கை தெரிவித்தார்.
முக்கியமாக, விஜய் ஆஸ்திரேலியா செல்லவிருப்பதாக சமூக வலைதளங்களில் பரவி வரும் தகவல்களுக்கு ஆதவ் அர்ஜுனா முற்றுப்புள்ளி வைத்தார். இதுகுறித்து எள்ளல் தொனியில் பதிலளித்த அவர், “விஜய் ஆஸ்திரேலியா செல்லவில்லை, வேண்டுமானால் திமுக ஏற்பாடு செய்த ராக்கெட்டில் அவர் நிலாவிற்குச் செல்கிறார் என்று கூடச் சொல்வார்கள்” என விமர்சித்தார். இத்தகைய புரளிகள் திமுக தோல்வி பயத்தில் பரப்புவதாகவும், விஜய் தற்போது கட்சிப் பணிகளிலும், வாக்கு எண்ணிக்கையின் போது வேட்பாளர்கள் கடைப்பிடிக்க வேண்டிய வழிமுறைகள் குறித்தும் தீவிரமாக ஆலோசித்து வருவதாக அவர் விளக்கமளித்தார்.
சுமார் 50 ஆண்டுகளுக்குப் பிறகு தமிழக அரசியலில் ஒரு மாபெரும் மாற்றம் ஏற்படப் போவதாகக் குறிப்பிட்ட அவர், வருகிற மே 4-ஆம் தேதி தேர்தல் முடிவுகள் வெளியாகும் போது ஒட்டுமொத்த நாடே ஸ்தம்பிக்கும் வகையில் தவெகவின் வெற்றி இருக்கும் என்றார். திமுக ஆட்சிக்காலம் முடிவுக்கு வந்துவிட்டதாகவும், தோல்வியின் விளிம்பில் இருக்கும் அந்த கட்சி தற்போது ரவுடியிசத்தைக் கையில் எடுத்துள்ளதாகவும் ஆதவ் அர்ஜுனா குற்றம் சாட்டினார். இந்தத் தேர்தல் முடிவுகள் தமிழக அரசியலில் புதிய அத்தியாயத்தைத் தொடங்கும் என்ற எதிர்பார்ப்பு தற்போது அதிகரித்துள்ளது.