விஷ கடிதம் முதல் துப்பாக்கித் தோட்டா வரை… டொனால்ட் டிரம்பின் உயிருக்கு இத்தனை ஆபத்துகளா?… டிரம்பின் மறக்க முடியாத ரத்த சரித்திரம்..!

அமெரிக்காவின் அதிபரும் தற்போதைய முக்கிய அரசியல் தலைவருமான டொனால்ட் டிரம்ப், தொடர்ச்சியாகப் பல்வேறு பாதுகாப்பு அச்சுறுத்தல்களைச் சந்தித்து வருகிறார். நேற்று இரவு வாஷிங்டன் ஹில்டன் ஹோட்டலில் நடந்த வெள்ளை மாளிகை செய்தியாளர்கள் சங்க விருந்து நிகழ்ச்சியின் போது, திடீரென துப்பாக்கிச் சூடு சத்தம் கேட்டது பெரும் பரபரப்பை ஏற்படுத்தியது. சீக்ரெட் சர்வீஸ் ஏஜெண்டுகள் உடனடியாகச் செயல்பட்டு டிரம்ப், மெலனியா டிரம்ப் மற்றும் ஜே.டி. வேன்ஸ் ஆகியோரைப் பாதுகாப்பாக வெளியேற்றினர். இந்தச் சம்பவத்தில் பாதுகாப்பு அதிகாரி ஒருவர் காயமடைந்தாலும், புல்லட் புரூப் ஜாக்கெட் அணிந்திருந்ததால் நல்வாய்ப்பாக உயிர் தப்பினார்; சந்தேக நபர் தற்போது கைது செய்யப்பட்டுள்ளார்.

கடந்த சில மாதங்களாகவே டிரம்பைக் குறிவைத்துத் தாக்குதல் முயற்சிகள் அதிகரித்துள்ளன. பிப்ரவரி மாதம் மார்-ஏ-லாகோ இல்லத்திற்குள் துப்பாக்கியுடன் நுழைய முயன்ற இளைஞர் சுட்டுக் கொல்லப்பட்டதும், கடந்த ஆண்டு அக்டோபரில் அவரது விமானத்தை (Air Force One) இலக்காக வைத்து 20 அடி உயரத்தில் வேட்டை மேடை (Hunting stand) அமைக்கப்பட்டிருந்ததும் பாதுகாப்புத் துறையினரைக் கடும் அதிர்ச்சியில் ஆழ்த்தியது. ஸ்னைப்பர் தாக்குதலுக்கான இத்தகைய நுணுக்கமான திட்டங்களை முன்கூட்டியே கண்டறிந்த அதிகாரிகள், மிகப்பெரிய அசம்பாவிதங்களைத் தவிர்த்து வருகின்றனர்.

டிரம்பின் அரசியல் பயணத்தில் 2024 ஜூலை மாதம் பென்சில்வேனியாவில் நடந்த பேரணி மிகவும் மறக்க முடியாதது. தாமஸ் க்ரூக்ஸ் என்ற இளைஞன் ஏஆர்-15 ரக துப்பாக்கியால் சுட்டபோது, குண்டு டிரம்பின் வலது காது நுனியைக் கிழித்துச் சென்றது. நூலிழையில் அவர் உயிர் தப்பிய இந்தத் தாக்குதலில், பின்னணியில் இருந்த கோரி காம்பெரடோர் என்ற ஆதரவாளர் உயிரிழந்தார். இந்தச் சம்பவத்தில் ஏற்பட்ட பாதுகாப்பு குறைபாடு காரணமாகச் சீக்ரெட் சர்வீஸ் இயக்குனர் கிம்பர்லி சீட்டில் தனது பதவியை ராஜினாமா செய்யும் சூழல் உருவானது.

துப்பாக்கிச் சூடு மட்டுமன்றி, விஷக் கடிதங்கள் மற்றும் வெளிநாட்டுச் சதிகளும் டிரம்பைத் துரத்தி வருகின்றன. 2018 மற்றும் 2020-களில் ‘ரிசின்’ (Ricin) என்ற கொடிய விஷம் தடவப்பட்ட கடிதங்கள் அவருக்கு அனுப்பப்பட்டன. மேலும், 2024-ல் டிரம்பைக் கொல்ல ஈரான் திட்டமிட்டதாக அமெரிக்க நீதித்துறை குற்றம் சாட்டியதுடன், இது தொடர்பாக ஆசிப் மெர்ச்சண்ட் உள்ளிட்ட பலரைக் கைது செய்தது. செப்டம்பர் மாதம் புளோரிடா கோல்ஃப் மைதானத்தில் ரயான் வெஸ்லி ரவுத் துப்பாக்கியுடன் பதுங்கியிருந்ததும் டிரம்பிற்கான பாதுகாப்பு வளையத்தை மேலும் பலப்படுத்த வேண்டிய அவசியத்தை உணர்த்தியுள்ளது.