தமிழகத்தில் 234 தொகுதிகளுக்கும் விறுவிறுப்பாக வாக்குப்பதிவு நடைபெற்று முடிந்துள்ள நிலையில், அரசியல் களம் அடுத்தகட்ட நகர்வுகளை நோக்கித் திரும்பியுள்ளது. இதுவரை இல்லாத வகையில் 85% வாக்குகள் பதிவாகியிருப்பது ஆச்சரியத்தை ஏற்படுத்தினாலும், இது எந்தக் கட்சிக்குச் சாதகமாக அமையும் என்ற விவாதம் தற்போதே தொடங்கிவிட்டது. இந்தத் தேர்தலில் திமுக மற்றும் அதிமுக கூட்டணிகள் வழக்கம் போல வலிமையாகக் களம் கண்ட நிலையில், நடிகர் விஜய்யின் தமிழக வெற்றிக் கழகம் முதல்முறையாகத் தனித்துப் போட்டியிட்டு அனைவரது கவனத்தையும் ஈர்த்துள்ளது. மே 4-ம் தேதி தேர்தல் முடிவுகள் வெளியாக உள்ள நிலையில், தமிழக அரசியல் வரலாற்றில் இது ஒரு முக்கியத் திருப்புமுனையாகப் பார்க்கப்படுகிறது.
இந்தச் சூழலில், தமிழகத்தில் தொங்கு சட்டசபை அமைந்தால் அதிமுக மற்றும் விஜய் இடையே கூட்டணி ஏற்பட வாய்ப்புள்ளதாகச் சில தகவல்கள் பரவின. ஆனால், பாஜகவின் தேசியத் தலைவர் நிதின் நபின் இதனைத் திட்டவட்டமாக மறுத்துள்ளார். “தமிழகத்தில் தேசிய ஜனநாயகக் கூட்டணி (NDA) பெரும்பான்மையுடன் ஆட்சியமைக்கும் என்பதில் உறுதியாக இருக்கிறோம்; எனவே, தேர்தலுக்குப் பிந்தைய கூட்டணி என்ற பேச்சுக்கே இடமில்லை” என்று அவர் தெரிவித்துள்ளார். விஜய்யுடன் கைகோர்க்க வேண்டிய தேவை தங்களுக்கு எழாது என்றும், தங்களது தற்போதைய கூட்டணியே வலுவாக இருப்பதாகவும் அவர் ஒரு பேட்டியில் சுட்டிக்காட்டியுள்ளார்.
விஜய்யின் அரசியல் வருகை குறித்துப் பேசிய நிதின் நபின், சினிமா கவர்ச்சியை மட்டுமே நம்பி அரசியலுக்கு வருபவர்கள் நீண்ட காலம் நிலைத்து நிற்பது கடினம் என்ற கருத்தை முன்வைத்தார். “பெரிய ஆளுமைகள் அரசியலுக்குள் பிரம்மாண்டமாக நுழைவதை நாம் பார்த்திருக்கிறோம், ஆனால் அடிமட்ட அளவில் அவர்கள் எந்தளவுக்கு மக்களிடம் சென்று சேர்கிறார்கள் என்பதே முக்கியம்” என்று கூறிய அவர், விஜய் ஒரு தாக்கத்தை ஏற்படுத்துவார் என்பதை விட, இது அவருக்கு ஒரு தொடக்கமாக மட்டுமே இருக்கும் என்று கணித்துள்ளார். விஜய்யின் வருகை ஒரு மிகப் பெரிய மாற்றத்தை உருவாக்கும் எனத் தான் நினைக்கவில்லை என்றும் அவர் வெளிப்படையாகத் தெரிவித்துள்ளார்.
தமிழகத்தில் ஆட்சியமைக்கத் தேவையான இடங்களைப் பிடிப்போம் என பாஜக நம்பிக்கை தெரிவித்துள்ள நிலையில், அதிமுக மற்றும் திமுக தரப்பிலும் வெற்றி குறித்த எதிர்பார்ப்பு அதிகரித்துள்ளது. விஜய்யின் தமிழக வெற்றிக் கழகம் பிரிக்கும் வாக்குகள் யாருடைய வெற்றியைப் பாதிக்கும் என்பதுதான் இப்போதைய மில்லியன் டாலர் கேள்வியாக உள்ளது. வரும் மே 4-ம் தேதி வாக்கு எண்ணிக்கை முடிவில், விஜய்யின் அரசியல் பயணம் மக்கள் மத்தியில் எந்தளவுக்கு எடுபட்டுள்ளது என்பதும், நிதின் நபினின் கணிப்பு பலிக்குமா என்பதும் தெளிவாகத் தெரியவரும்.