தமிழக சட்டமன்றத் தேர்தலில் இதுவரை இல்லாத அளவாக 84.69 சதவீத வாக்குகள் பதிவாகியுள்ளது, அரசியல் களத்தில் பெரும் விவாதத்தைக் கிளப்பியுள்ளது. இந்த வரலாற்றுச் சிறப்புமிக்க உயர்விற்கு நடிகர் விஜய்யின் அரசியல் வருகையே காரணம் எனத் தமிழக வெற்றிக் கழகத்தினர் கூறி வரும் நிலையில், திமுக மற்றும் அதிமுக உள்ளிட்ட மாற்றுக் கட்சிகள் இதனை மறுக்கின்றன. வாக்காளர் பட்டியலில் மேற்கொள்ளப்பட்ட சீர்திருத்தங்கள் (SIR) காரணமாக மொத்த வாக்காளர் எண்ணிக்கை குறைந்ததே இந்தச் சதவீத உயர்வுக்குக் காரணம் என்றும், வெறும் 20 லட்சம் வாக்குகள் மட்டுமே கூடுதலாகப் பதிவாகியுள்ளன என்றும் எதிர்க்கட்சிகள் புள்ளிவிவரங்களுடன் பதிலடி கொடுத்து வருகின்றன.
இந்நிலையில், பிரபல ஒளிப்பதிவாளரும் நடிகருமான நட்டி நட்ராஜ், விஜய்க்கு ஆதரவாக ஒரு அதிரடிப் பதிவை வெளியிட்டுள்ளார். “20 லட்சம் மட்டும்தான் என சொல்பவர்களுக்கு” என்று கிண்டலாகக் குறிப்பிட்டு, தான் நடித்த ‘கம்பி கட்ற கதை’ பட போஸ்டரைப் பகிர்ந்து விஜய்யின் அரசியல் வருகை ஏற்படுத்திய தாக்கத்தை குறைத்து மதிப்பிடுபவர்களைச் சாடியுள்ளார். திரையுலகைச் சேர்ந்தவர்கள் வெளிப்படையாகத் தங்கள் ஆதரவைத் தெரிவித்து வருவது, மே 4-ஆம் தேதி வரவுள்ள தேர்தல் முடிவுகள் மீதான எதிர்பார்ப்பை இன்னும் அதிகரித்துள்ளது.