மத்திய கிழக்கில் நிலவி வரும் தீவிர போர் பதற்றம் காரணமாக, பெர்ஷியன் வளைகுடாவில் நூற்றுக்கணக்கான வணிகக் கப்பல்கள் கடந்த 54 நாட்களாக முடங்கிக் கிடக்கின்றன. அமெரிக்கா மற்றும் இஸ்ரேல் ஈரான் மீது நடத்திய தாக்குதல்களைத் தொடர்ந்து, பதிலடி நடவடிக்கையாக ஈரானின் IRGC படை ஹார்முஸ் ஜலசந்தியை முழுமையாக முடக்கியுள்ளது. இதனால் கச்சா எண்ணெய், எரிவாயு மற்றும் அத்தியாவசிய சரக்குகளை ஏற்றிச் செல்லும் கப்பல்கள் வெளியேற முடியாமல் தவிக்கின்றன. பல கப்பல்களில் உணவுப் பொருட்கள் தீர்ந்து வரும் நிலையில், மாலுமிகளின் பாதுகாப்பு மற்றும் வாழ்வாதாரம் பெரும் கேள்விக்குறியாக மாறியுள்ளது.
சர்வதேச கடல் அமைப்பின் (IMO) பொதுச்செயலாளர் அர்செனியோ டொமிங்குயெஸ், சிங்கப்பூர் மரைன் வீக் நிகழ்ச்சியில் உரையாற்றுகையில், இந்த நெருக்கடியைத் தீர்க்க விரிவான மீட்புத் திட்டம் தயார் செய்யப்பட்டு வருவதாக அறிவித்தார். இருப்பினும், இந்தத் திட்டம் உடனடியாக அமலுக்கு வராது என்றும், பிராந்தியத்தில் தெளிவான போர் நிறுத்த அறிகுறிகள் தென்பட்டால் மட்டுமே மீட்புப் பணிகள் தொடங்கும் என்றும் அவர் நிபந்தனை விதித்துள்ளார். கப்பல்களில் உள்ள பணியாளர்களின் தங்கும் காலம் மற்றும் அவசரத் தேவைகளைக் கருத்தில் கொண்டு, முன்னுரிமை அடிப்படையில் கப்பல்களை வெளியேற்ற IMO திட்டமிட்டுள்ளது.
இந்த மீட்பு நடவடிக்கைக்கு 1968-ஆம் ஆண்டு ஈரான் மற்றும் ஓமன் நாடுகள் முன்மொழிந்த ‘போக்குவரத்து பிரிவினை திட்டத்தை’ (Traffic Separation Scheme) மீண்டும் பயன்படுத்த IMO முடிவு செய்துள்ளது. ஈரானிய கடற்கரையோரம் உள்ள குறிப்பிட்ட பாதுகாப்பான பாதையை மட்டுமே கப்பல்கள் பயன்படுத்த வேண்டும் என ஈரான் வலியுறுத்தியுள்ளது. மற்ற பகுதிகளில் கடல் கண்ணிவெடிகள் வைக்கப்பட்டுள்ளதாக விடுக்கப்பட்டுள்ள அச்சுறுத்தல் மற்றும் கப்பல்கள் வெளியேற ஈரான் விதிக்கும் கட்டணங்கள் ஆகியவை இந்த மீட்புத் திட்டத்தில் பெரும் சவால்களாக உருவெடுத்துள்ளன.
உலகின் மிக முக்கியமான எரிசக்தி வழித்தடமான பெர்ஷியன் வளைகுடாவில் ஏற்பட்டுள்ள இந்த முடக்கம், உலகளாவிய எண்ணெய் விலையில் கடும் தாக்கத்தை ஏற்படுத்தியுள்ளது. இந்நிலையில், இப்பிரச்சினைக்குத் தீர்வு காணும் வகையில் நாளை பாகிஸ்தானில் அமெரிக்கா மற்றும் ஈரான் இடையே முக்கிய பேச்சுவார்த்தை நடைபெற உள்ளது. ஓமன் மற்றும் ஈரான் நாடுகளுடன் இணைந்து IMO இறுதி செய்து வரும் இந்த மீட்புத் திட்டம், பேச்சுவார்த்தையில் எட்டப்படும் அமைதி உடன்படிக்கையைப் பொறுத்தே முழுமையாகச் செயல்பாட்டிற்கு வரும் என எதிர்பார்க்கப்படுகிறது.