சென்னை வில்லிவாக்கம் சட்டமன்றத் தொகுதியில் தேர்தல் களம் சூடுபிடித்துள்ள நிலையில், தமிழக வெற்றிக் கழகத்தைச் (தவெக) சேர்ந்த 300-க்கும் மேற்பட்ட இளைஞர்கள் அக்கட்சியிலிருந்து விலகி திமுகவில் இணைந்துள்ளனர். திமுக வேட்பாளர் கார்த்திக் மோகன் முன்னிலையில் நடைபெற்ற இந்நிகழ்வில், மாற்றுக்கட்சியிலிருந்து வந்த இளைஞர்களை அவர் சால்வை அணிவித்து வரவேற்றார். புதிய உறுப்பினர்களிடம் பேசிய கார்த்திக் மோகன், “என்னை எப்போது வேண்டுமானாலும் இல்லத்தில் சந்தித்து உங்கள் குறைகளை நேரடியாகத் தெரிவிக்கலாம்; இளைஞர்களின் தேவைகள் அனைத்தும் நிச்சயம் நிறைவேற்றப்படும்” என்று உறுதியளித்தார்.
தமிழக வெற்றிக் கழகத்தின் அணுகுமுறை சரியாக இல்லை என்ற அதிருப்தி காரணமாகவே இந்த முடிவை எடுத்துள்ளதாக இளைஞர்கள் தரப்பில் தெரிவிக்கப்பட்டுள்ளது. இது குறித்து கார்த்திக் மோகன் கூறுகையில், கட்சியில் நிலவும் அதிருப்தி காரணமாக இளைஞர்கள் தம்மை அணுகியதாகவும், திமுகவின் கதவுகள் எப்போதும் திறந்தே இருக்கும் என்பதால் அவர்களை மகிழ்ச்சியுடன் வரவேற்பதாகவும் செய்தியாளர்களிடம் தெரிவித்தார். தவெக சார்பில் போட்டியிடும் ஆதவ் அர்ஜுனாவால் நட்சத்திர அந்தஸ்து பெற்றுள்ள இத்தொகுதியில், இந்தத் திடீர் கட்சித் தாவல் அரசியல் வட்டாரத்தில் பெரும் பரபரப்பை ஏற்படுத்தியுள்ளது.
திமுகவில் இணைந்த இளைஞர் ஒருவர் கூறுகையில், “எங்களுக்கு நடிகர் விஜய்யை மிகவும் பிடிக்கும், ஆனால் அவருக்குக் கீழ் இருப்பவர்களை அணுகுவது பெரும் சவாலாக உள்ளது. குறிப்பாக, வேட்பாளர் ஆதவ் அர்ஜுனாவைச் சந்திக்க வேண்டும் என்றால் 20 பேரைக் கடந்து செல்ல வேண்டியுள்ளது; சாதாரணத் தொண்டர்களால் அவரைப் பார்க்கவே முடியவில்லை. கட்சி உருவானது முதல் உழைத்த எங்களைப் போன்றவர்களுக்கு எவ்வித அங்கீகாரமும் கிடைக்கவில்லை. மற்ற மாவட்டங்களிலும் இதே நிலைதான் நீடிக்கிறது” என்று ஆதங்கத்துடன் தெரிவித்தார்.
தமிழகத்தில் உள்ள 234 தொகுதிகளுக்கும் வரும் ஏப்ரல் 23-ஆம் தேதி ஒரே கட்டமாகத் தேர்தல் நடைபெற உள்ளது. வில்லிவாக்கத்தில் திமுகவின் கார்த்திக் மோகன், தவெகவின் ஆதவ் அர்ஜுனா, அதிமுகவின் எஸ்.ஆர்.விஜயகுமார் மற்றும் நாம் தமிழர் கட்சியின் ரோஷினி என நால்வர் போட்டி நிலவுகிறது. வாக்குப்பதிவு முடிந்து மே 4-ஆம் தேதி முடிவுகள் அறிவிக்கப்பட உள்ள நிலையில், தேர்தல் நெருங்கும் வேளையில் தவெக இளைஞர்கள் திமுகவில் இணைந்திருப்பது அத்தொகுதியின் தேர்தல் முடிவுகளில் தாக்கத்தை ஏற்படுத்தக்கூடும் என எதிர்பார்க்கப்படுகிறது.