தமிழகத் திரையுலகில் நடிகர் விஜய்யின் முன்னாள் மேலாளராகவும், ‘புலி’ படத்தின் தயாரிப்பாளராகவும் அறியப்படுபவர் பி.டி. செல்வகுமார். விஜய்யுடன் ‘கோயமுத்தூர் மாப்பிள்ளை’ படத்தில் நடித்ததுடன், ‘சுறா’, ‘வில்லு’, ‘போக்கிரி’ போன்ற பல படங்களுக்கு மக்கள் தொடர்பு அதிகாரியாகவும் (PRO) பணியாற்றியுள்ளார். விஜய்யிடமிருந்து பிரிந்த பிறகு ‘கலப்பை மக்கள் இயக்கம்’ என்ற அமைப்பைத் தொடங்கி சமூகப் பணிகளில் ஈடுபட்டு வந்த அவர், கடந்த சில காலங்களாகவே தனது அரசியல் பாதையைத் தீர்மானிப்பதில் தீவிரமாக இருந்து வந்தார்.
கடந்த டிசம்பர் மாதம் எதிர்பாராத திருப்பமாக முதல்வர் மு.க. ஸ்டாலின் முன்னிலையில் திமுகவில் இணைந்த பி.டி. செல்வகுமாருக்கு, அக்கட்சியின் மாநில வர்த்தகர் அணியில் துணைச் செயலாளர் பொறுப்பு வழங்கப்பட்டது. நடந்து வரும் சட்டமன்றத் தேர்தலில் திமுக சார்பில் போட்டியிட வாய்ப்பு கிடைக்கும் என அவர் பெரிதும் எதிர்பார்த்தார். ஆனால், அவருக்கு சீட் வழங்கப்படாததால் அதிருப்தி அடைந்த அவர், திமுகவில் இருந்து விலகுவதாக அதிரடியாக அறிவித்தார். தனது பழைய இயக்கமான கலப்பை மக்கள் இயக்கத்தை மீண்டும் கையில் எடுத்த அவர், தனது அடுத்தகட்ட அரசியல் நகர்வைத் திட்டமிட்டார்.
திமுகவில் இருந்து வெளியேறிய கையோடு, கன்னியாகுமரி சட்டமன்றத் தொகுதி அதிமுக வேட்பாளர் என். தளவாய் சுந்தரத்திற்கு ஆதரவு அளிப்பதாக அறிவித்த பி.டி. செல்வகுமார், கடந்த ஒரு வாரமாக தீவிரப் பிரச்சாரத்தில் ஈடுபட்டு வந்தார். இந்த நிலையில், கன்னியாகுமரி மாவட்டத்திற்கு வருகை தந்த அதிமுக பொதுச்செயலாளர் எடப்பாடி கே. பழனிசாமியை நேரில் சந்தித்து தனது ஆதரவை உறுதிப்படுத்தினார். இந்தச் சந்திப்பு அரசியல் வட்டாரத்தில் பெரும் கவனத்தைப் பெற்றுள்ளது.
இந்தச் சந்திப்பின் போது, அதிமுக வேட்பாளர் தளவாய் சுந்தரத்தின் வெற்றிக்காகத் தனது கலப்பை மக்கள் இயக்கம் அர்ப்பணிப்புடன் களப்பணியாற்றும் என்று பி.டி. செல்வகுமார் உறுதியளித்தார். மேலும், கன்னியாகுமரி மாவட்டத்தின் பிற தொகுதிகளிலும் அதிமுக மற்றும் அதன் கூட்டணி வேட்பாளர்களின் வெற்றியை உறுதி செய்யத் தீவிரமாகப் பணியாற்றப் போவதாக அவர் தெரிவித்துள்ளார். விஜய்யின் நிழலாக இருந்த ஒருவர், தற்போது அதிமுகவின் வெற்றிக்காகக் களம் இறங்கியிருப்பது தேர்தல் களத்தில் கூடுதல் சுவாரசியத்தை ஏற்படுத்தியுள்ளது.