குஜராத் மாநிலம் அகமதாபாத்தில் உள்ள சந்த்கேடா பகுதியில், பிரஜாபதி குடும்பத்தைச் சேர்ந்த இரண்டு சிறுமிகள் மர்மமான முறையில் உயிரிழந்த சம்பவம் பெரும் பரபரப்பை ஏற்படுத்தியுள்ளது. ஆரம்பத்தில், தோசை சாப்பிட்டதால் ஏற்பட்ட ‘புட் பாய்சனிங்’ (உணவு நஞ்சூட்டல்) காரணமாகவே இவர்கள் இறந்ததாகக் கருதப்பட்டது. ஆனால், தடய அறிவியல் ஆய்வகத்தின் (FSL) அறிக்கை இந்த வழக்கில் அதிரடி திருப்பத்தை ஏற்படுத்தியுள்ளது. சிறுமிகளின் மரணத்திற்கு உணவு நஞ்சூட்டல் காரணமல்ல என்றும், அவர்கள் ‘சல்பாஸ்’ எனப்படும் வீரியமிக்க நச்சுப் பொருளை உட்கொண்டதே காரணம் என்றும் அந்த அறிக்கை உறுதிப்படுத்தியுள்ளது. மேலும், அவர்களின் வீட்டிலிருந்து போலீசார் சல்பாஸ் மாத்திரைகளைக் கைப்பற்றியுள்ளனர்.
இந்தச் சம்பவம் தற்கொலையா அல்லது திட்டமிட்ட கொலையா என்ற கோணத்தில் போலீசார் தீவிர விசாரணை நடத்தி வருகின்றனர். விசாரணையில் சிக்கிய ஒரு நாட்குறிப்பு (டைரி), இந்த வழக்கிற்குப் புதிய பரிமாணத்தைக் கொடுத்துள்ளது. அந்த டைரியில், தாய் பாவ்னா பிரஜாபதிக்கு ஒரு மகன் வேண்டும் என்ற அதீத ஆசை இருந்தது தெரியவந்துள்ளது. முதல் மகளுக்குப் பிறகு இரண்டாவது குழந்தையாவது மகனாகப் பிறக்க வேண்டும் என்று அந்த குடும்பம் ஏங்கியுள்ளது. இந்த ‘ஆண் வாரிசு’ மோகமே இரண்டு பெண் குழந்தைகளின் உயிரிழப்பிற்குத் தூண்டுகோலாக இருந்திருக்குமோ என்ற சந்தேகத்தில் போலீசார் விசாரணையை முடுக்கிவிட்டுள்ளனர்.
இந்த வழக்கில் இதுவரை 25-க்கும் மேற்பட்டோரிடம் போலீசார் வாக்குமூலம் பெற்றுள்ளனர். உயிரிழந்த சிறுமிகளின் தந்தை விமல் பிரஜாபதி ஒரு மாடலிங் கலைஞர் என்பதும், அவர் ஆஸ்திரேலியாவிற்குச் குடியேறத் திட்டமிட்டிருந்ததும் தெரியவந்துள்ளது. மேலும், இந்தக் குடும்பத்திற்குச் சொந்தமான மருந்துக் கடையிலிருந்து தான் அந்த நச்சுப் பொருள் கொண்டு வரப்பட்டதா என்பதை அறிய, கடையின் சிசிடிவி காட்சிகளைப் போலீசார் ஆய்வு செய்து வருகின்றனர். தாத்தா, பாட்டி உட்பட குடும்ப உறுப்பினர்கள் அனைவரிடமும் விசாரணை நடத்தப்பட்டு வரும் நிலையில், மொபைல் போன் அழைப்பு விவரங்களை (CDR) வைத்தும் போலீசார் இந்த மர்ம முடிச்சை அவிழ்க்க முயன்று வருகின்றனர்.