கடந்த சில நாட்களாக அனல் பறக்கும் தேர்தல் பிரசாரத்தில் தீவிரமாக ஈடுபட்டு வந்த திமுக இளைஞரணி செயலாளர் உதயநிதி ஸ்டாலினுக்கு, கடும் பணிச்சுமை காரணமாக திடீர் உடல்நலக்குறைவு ஏற்பட்டுள்ளது. இன்று காலை மாதவரம் தொகுதி திமுக வேட்பாளர் எஸ்.சுதர்சனத்தை ஆதரித்து பிரசாரத்தில் ஈடுபட்டிருந்தபோது, அவருக்கு தொண்டை பாதிப்பு ஏற்பட்டு குரல் கரகரப்பாக மாறியது.
இதனால் மேடையில் பேசுவதற்கு மிகவும் சிரமப்பட்ட அவர், தனது உடல்நிலை சீராக இல்லாத காரணத்தால் பொதுமக்களிடம் நீண்ட நேரம் உரையாற்ற முடியவில்லை என்று வருத்தத்துடன் தெரிவித்ததுடன், தனது பேச்சை பாதியிலேயே முடித்துக்கொண்டு அங்கிருந்து கிளம்பினார். இடைவிடாத பயணங்களும், தொடர் பேச்சுகளுமே இந்த பாதிப்புக்குக் காரணம் எனக் கூறப்படும் நிலையில், இந்தச் செய்தி அவரது கட்சியினரிடையே சிறு கவலையை ஏற்படுத்தியுள்ளது.