ஆஸ்திரேலிய அணியின் முன்னாள் அதிரடி ஆட்டக்காரர் டேவிட் வார்னர், சிட்னியில் மதுபோதையில் வாகனம் ஓட்டியதாகக் கைது செய்யப்பட்டு பின் விடுவிக்கப்பட்ட சம்பவம் கிரிக்கெட் வட்டாரத்தில் பெரும் அதிர்ச்சியை ஏற்படுத்தியுள்ளது. கடந்த ஞாயிற்றுக்கிழமை (ஏப்ரல் 5, 2026) மாலை சிட்னியின் மருப்ரா பகுதியில் காவல்துறையினர் வழக்கமான வாகன சோதனையில் ஈடுபட்டிருந்தபோது, வார்னர் ஓட்டி வந்த வாகனம் சோதனைச் சாவடிக்குச் சற்று முன்பாகவே நிறுத்தப்பட்டது. இதனால் சந்தேகமடைந்த அதிகாரிகள், வாகனத்தை அணுகி வார்னருக்கு சுவாசப் பரிசோதனை செய்தபோது அவர் மது அருந்தியது உறுதியானது.
இதனைத் தொடர்ந்து கைது செய்யப்பட்ட வார்னர், மருப்ரா காவல் நிலையத்திற்கு அழைத்துச் செல்லப்பட்டு இரண்டாம் கட்டப் பரிசோதனைக்கு உட்படுத்தப்பட்டார். அந்தப் பரிசோதனையில், ஆஸ்திரேலிய சட்டப்படி அனுமதிக்கப்பட்ட அளவை விட இரண்டு மடங்கு அதிகமாக (0.104) அவரது ரத்தத்தில் மதுவின் அளவு இருந்தது தெரியவந்தது. இது நடுத்தர அளவிலான (middle-range PCA) விதிமீறலாகக் கருதப்படுகிறது. இதனைத் தொடர்ந்து அவர் மீது வழக்குப் பதிவு செய்த காவல்துறையினர், அவரை நீதிமன்றத்தில் முன்னிலையாகுமாறு நோட்டீஸ் வழங்கி விடுவித்தனர்.
வார்னர் தற்போது பாகிஸ்தான் சூப்பர் லீக் (PSL) தொடரில் கராச்சி கிங்ஸ் அணியின் கேப்டனாக விளையாடி வருகிறார். லாகூரில் நடந்த போட்டிக்குப் பிறகு கிடைத்த இடைவேளையின் போது அவர் தனது சொந்த ஊரான சிட்னிக்குச் சென்றிருந்தபோது இந்தச் சம்பவம் நிகழ்ந்துள்ளது. சர்வதேச கிரிக்கெட்டில் இருந்து 2024-ம் ஆண்டு ஓய்வு பெற்ற வார்னர், தற்போது பல்வேறு டி20 லீக் தொடர்களில் பங்கேற்று வருகிறார். இந்த மதுபோதை வழக்கு தொடர்பாக அவர் வரும் மே 7-ம் தேதி சிட்னி நீதிமன்றத்தில் நேரில் ஆஜராக வேண்டும் என்று உத்தரவிடப்பட்டுள்ளது.