“நடுக்கடலில் நடந்த ‘ஆயில்’ பாலிடிக்ஸ்!… இந்தியாவுக்கு வராமல் எஸ்கேப் ஆன கப்பல்… தட்டி தூக்கிய சீனா… பின்னணியில் இருக்கும் அந்த ரகசியம்”…!!!

சர்வதேச எரிசக்தி சந்தையில் நிலவும் பதற்றமான சூழலில், இந்தியாவுக்கும் ஈரானுக்கும் இடையிலான கச்சா எண்ணெய் வர்த்தகம் மீண்டும் முக்கியத்துவம் பெற்றுள்ளது. 2019-ம் ஆண்டு அமெரிக்கத் தடைகள் காரணமாக நிறுத்தப்பட்ட இந்த வர்த்தகம், தற்போது மத்திய கிழக்கில் நிலவும் போர் மற்றும் ஹார்முஸ் ஜலசந்தி (Strait of Hormuz) மூடப்பட்டதால் ஏற்பட்டுள்ள உலகளாவிய எரிபொருள் நெருக்கடியைத் தொடர்ந்து மீண்டும் தொடங்கியுள்ளது. குறிப்பாக, அமெரிக்கா வழங்கிய 30 நாள் சிறப்புத் தளர்வின் அடிப்படையில், ஏழு ஆண்டுகளுக்குப் பிறகு ஈரானிலிருந்து 6,00,000 பேரல் கச்சா எண்ணெயை ஏற்றிக்கொண்டு ‘பிங் ஷுன்’ (Ping Shun) என்ற கப்பல் இந்தியா நோக்கி வந்துகொண்டிருந்தது.

இந்தக் கப்பல் குஜராத்தின் வாதினார் துறைமுகத்தில் உள்ள நயாரா எனர்ஜி (Nayara Energy) சுத்திகரிப்பு நிலையத்திற்கு ஏப்ரல் 4-ம் தேதி வந்து சேரும் என்று எதிர்பார்க்கப்பட்டது. இருப்பினும், இலக்கை நெருங்கும் நேரத்தில் திடீரென தனது பயணப் பாதையை மாற்றி, சீனாவின் டோங்யிங் (Dongying) நோக்கித் திசை திரும்பியுள்ளதாக கப்பல் கண்காணிப்பு நிறுவனமான Kpler தெரிவித்துள்ளது. 2025-ல் அமெரிக்காவால் தடை செய்யப்பட்ட பட்டியலில் இடம் பெற்றுள்ள இந்தக் கப்பல், கடைசி நேரத்தில் சீனாவுக்குத் திருப்பப்பட்டது இந்திய எரிசக்தி துறையில் பெரும் பரபரப்பை ஏற்படுத்தியுள்ளது.

இந்தத் திடீர் மாற்றத்திற்குப் பின்னால் முக்கியமாகப் பணப் பரிமாற்றச் சிக்கல்கள் இருப்பதாகக் கூறப்படுகிறது. கச்சா எண்ணெய் விற்பனையாளர்கள் வழக்கமாக வழங்கும் 30 முதல் 60 நாட்கள் கடன் காலத்தைக் குறைத்து, தற்போது நிலவும் போர்ச் சூழல் காரணமாக உடனடிப் பணத்தைக் (Immediate Payment) கோருவதே இந்தத் தடுமாற்றத்திற்குக் காரணம் என்று ஆய்வாளர்கள் தெரிவிக்கின்றனர். சர்வதேச அளவில் எண்ணெய் விலையைக் குறைக்க அமெரிக்கா அளித்த இந்தத் தளர்வுகள் வரும் ஏப்ரல் 19-ம் தேதியுடன் முடிவடைய உள்ள நிலையில், இத்தகைய நிதி ரீதியான சிக்கல்கள் வர்த்தகத்தைப் பாதித்துள்ளன.

மறுபுறம், ரஷ்யாவுடனான எண்ணெய் வர்த்தகமும் அமெரிக்காவின் தற்காலிக அனுமதியுடன் மீண்டும் தொடங்கியுள்ளது. ஈரான் மற்றும் ரஷ்யா ஆகிய இரு நாடுகளிடமிருந்தும் எண்ணெய் பெறுவதில் இந்தியா மிகுந்த எச்சரிக்கையுடன் செயல்பட்டு வருகிறது. இது குறித்து விளக்கம் அளித்துள்ள இந்திய எண்ணெய் அமைச்சகம், வணிக ரீதியாகவும் தொழில்நுட்ப ரீதியாகவும் சாத்தியமானால் மட்டுமே ஈரானிய எண்ணெயை வாங்குவது குறித்து இறுதி முடிவு எடுக்கப்படும் என்று தெரிவித்துள்ளது. உலகளாவிய அரசியல் அழுத்தங்களுக்கு இடையே தனது எரிசக்தி பாதுகாப்பை உறுதி செய்ய இந்தியா தொடர்ந்து ராஜதந்திர நடவடிக்கைகளை மேற்கொண்டு வருகிறது.