அமெரிக்க அதிபர் டொனால்ட் டிரம்ப், பிரிக்ஸ் கூட்டமைப்பு நாடுகளுக்கு விடுத்துள்ள 100 சதவீத இறக்குமதி வரி எச்சரிக்கை உலக பொருளாதார அரங்கில் பெரும் பரபரப்பை ஏற்படுத்தியுள்ளது. சர்வதேச வர்த்தகத்தில் அமெரிக்க டாலருக்கு மாற்றாகப் புதிய நாணயத்தையோ அல்லது பிற நாட்டு நாணயங்களையோ பயன்படுத்துவதை பிரிக்ஸ் நாடுகள் ஊக்குவித்தால், அந்த நாடுகளிலிருந்து அமெரிக்காவிற்கு இறக்குமதி செய்யப்படும் பொருட்கள் மீது 100 சதவீத வரி விதிக்கப்படும் என டிரம்ப் அதிரடியாக அறிவித்துள்ளார்.
மேலும் அமெரிக்க டாலரின் மேலாதிக்கத்தைத் தக்கவைக்கவும், சர்வதேச சந்தையில் அமெரிக்காவின் பொருளாதாரப் பிடியை வலுப்படுத்தவும் இந்த கடுமையான நடவடிக்கை எடுக்கப்பட்டுள்ளதாகக் கருதப்படுகிறது. இந்தியாவைப் பொறுத்தவரை, அமெரிக்கா ஒரு முக்கியமான வர்த்தகக் கூட்டாளியாக இருப்பதால் இந்த அறிவிப்பு பெரும் கவலையை ஏற்படுத்தியுள்ளது.
இது குறிப்பாக, காப்புரிமை பெற்ற மருந்துகளுக்கு 100 சதவீத வரி விதிக்கப்படலாம் என்ற அச்சத்தால் இந்தியப் பங்குச்சந்தையிலும் அதன் தாக்கம் எதிரொலித்துள்ளது. டிரம்ப்பின் இந்த ‘அமெரிக்கா ஃபர்ஸ்ட்’ கொள்கை, இந்தியா உள்ளிட்ட வளரும் நாடுகளுடனான வர்த்தக உறவில் புதிய சவால்களை உருவாக்கியுள்ளதுடன், உலக நாடுகளை ஒருவித பொருளாதாரப் பதற்றத்திலேயே வைத்துள்ளது.