நேட்டோவில் இருந்து விலகும் அமெரிக்கா… உலகையே அதிரவைத்த டிரம்ப்பின் திடீர் முடிவு… அடுத்து நடக்கப்போவது என்ன…?

நேட்டோ (NATO) அமைப்பை “காகிதப் புலி” என்று மிகக் கடுமையாக விமர்சித்துள்ள அமெரிக்க அதிபர் டொனால்ட் டிரம்ப், அந்த அமைப்பிலிருந்து அமெரிக்கா வெளியேறுவது குறித்துத் தீவிரமாக ஆலோசித்து வருவதாகத் தெரிவித்துள்ளார். வளைகுடாப் போர் ஒரு மாதத்திற்கும் மேலாகத் நீடித்து வரும் சூழலில், ஈரானுக்கு எதிரான ராணுவ நடவடிக்கைகளில் நேட்டோ உறுப்பு நாடுகள் அமெரிக்காவிற்கு ஒத்துழைக்க மறுப்பதே டிரம்பின் இந்த ஆவேசத்திற்குக் காரணமாகப் பார்க்கப்படுகிறது. குறிப்பாக, ஹார்முஸ் ஜலசந்தியைத் திறக்கப் போர்க்கப்பல்களை அனுப்ப வேண்டும் என்ற அமெரிக்காவின் கோரிக்கையை நேட்டோ நாடுகள் நிராகரித்தது, சர்வதேச அளவில் கச்சா எண்ணெய் விலையேற்றத்திற்கும் பொருளாதார மந்தநிலைக்கும் வழிவகுத்துள்ளது.

ஈரான் விவகாரத்தில் நேட்டோ நாடுகள் தங்களுக்குத் துணை நிற்காததைச் சுட்டிக்காட்டிய டிரம்ப், “நேட்டோவில் அமெரிக்கா நீடிக்க வேண்டும் என்று நான் ஒருபோதும் சொன்னதில்லை; அது ஒரு காகிதப் புலி என்பது புதினுக்கும் நன்றாகத் தெரியும்” எனச் சாடியுள்ளார். உக்ரைன் உள்ளிட்ட பல விவகாரங்களில் அமெரிக்கா தன்னிச்சையாக முன்வந்து உதவியபோது அமைதியாக இருந்த நாடுகள், தற்போது அமெரிக்காவிற்குத் தேவை ஏற்படும்போது பின்வாங்குவது நியாயமற்றது என அவர் வாதிடுகிறார். குறிப்பாக பிரிட்டன் பிரதமர் கீர் ஸ்டார்மரை விமர்சித்த டிரம்ப், அந்நாட்டின் கடற்படை வலிமை குன்றிவிட்டதாகவும், பழைய கப்பல்களையும் வீரர்களையும் மட்டுமே அவர்கள் கொண்டுள்ளதாகவும் எள்ளி நகையாடியுள்ளார்.

அமெரிக்காவின் இந்த அதிருப்தி அதிபர் மட்டத்தோடு நிற்காமல், வெளியுறவுத்துறை ரீதியாகவும் எதிரொலிக்கிறது. அமெரிக்க வெளியுறவுத்துறை அமைச்சர் மார்கோ ரூபியோ இது குறித்துப் பேசுகையில், நேட்டோ என்பது ஒரு ‘ஒரு வழிப்பாதை’ போல மாறிவிட்டதாகக் குற்றம் சாட்டியுள்ளார். அமெரிக்கா தொடர்ந்து மற்ற நாடுகளுக்குப் பாதுகாப்பை வழங்கி வரும் நிலையில், பதிலுக்கு அந்த அமைப்பு அமெரிக்காவிற்கு எவ்வித நன்மையும் செய்வதில்லை என்பதே அவர்களின் கருத்தாக உள்ளது. எனவே, ஈரான் போர் முடிவுக்கு வந்தவுடன் நேட்டோவுடனான உறவை அமெரிக்கா அதிகாரப்பூர்வமாக மறுபரிசீலனை செய்யும் என்பதை அவர் உறுதிப்படுத்தியுள்ளார்.

இரண்டாம் உலகப் போருக்குப் பிந்தைய சூழலில், சோவியத் ஒன்றியத்தின் விரிவாக்கத்தைத் தடுக்கவும் கூட்டுப் பாதுகாப்பை உறுதி செய்யவும் உருவாக்கப்பட்ட நேட்டோ அமைப்பில் தற்போது 31 நாடுகள் உள்ளன. “ஒரு நாட்டின் மீது நடத்தப்படும் தாக்குதல் அனைத்து நாடுகளின் மீதான தாக்குதல்” என்ற விதியே இந்த அமைப்பின் முதுகெலும்பாகும். இத்தகைய சூழலில், நேட்டோவின் மிக முக்கியத் தூணாக விளங்கும் அமெரிக்கா அதிலிருந்து விலகினால், அது உலக அரசியலில் மிகப்பெரிய அதிகார மாற்றத்தையும், சர்வதேச பாதுகாப்பு கட்டமைப்பில் மிகப்பெரிய விரிசலையும் ஏற்படுத்தும் என்பதில் சந்தேகமில்லை.