சென்னையில் வணிக பயன்பாட்டிற்கான சமையல் எரிவாயு சிலிண்டர்களுக்கு கடும் தட்டுப்பாடு ஏற்பட்டுள்ளதால், உணவகத் தொழில் கடுமையாகப் பாதிக்கப்பட்டுள்ளது. பொதுச் சந்தையில் சிலிண்டர் கிடைக்காத சூழலைப் பயன்படுத்தி, கள்ளச்சந்தையில் ஒரு சிலிண்டர் 6,500 ரூபாய் வரை விற்கப்படுவதாக ஹோட்டல் உரிமையாளர்கள் வேதனையுடன் தெரிவிக்கின்றனர். இந்தத் திடீர் விலை உயர்வு மற்றும் தட்டுப்பாட்டினால் தினசரி வணிகத்தை நடத்துவதில் பெரும் சிக்கல் ஏற்பட்டுள்ளதாக அவர்கள் கூறுகின்றனர்.
மத்திய அரசு இந்தத் தட்டுப்பாட்டைப் போக்க உரிய நடவடிக்கை எடுக்கப்படும் என்று உறுதி அளித்திருந்தாலும், தற்போதைய கள நிலவரம் கவலைக்கிடமாகவே உள்ளது. எரிவாயு விலையேற்றம் மற்றும் தட்டுப்பாடு காரணமாக, உணவகங்களில் விற்கப்படும் உணவுப் பொருட்களின் விலையை உயர்த்த வேண்டிய கட்டாயத்திற்குத் தள்ளப்பட்டுள்ளதாக ஊழியர்கள் தெரிவிக்கின்றனர். இது சாதாரண நடுத்தர மக்களின் உணவுக் கட்டணத்தை அதிகரிக்கும் அபாயத்தை ஏற்படுத்தியுள்ளது.