சுமார் பதினோரு ஆண்டுகால இடைவேளைக்குப் பிறகு ‘ஹேப்பி ராஜ்’ திரைப்படத்தின் மூலம் தமிழ் சினிமாவிற்கு மீண்டும் வருகை தந்துள்ள நடிகர் அப்பாஸ், தனது திரைப்பயணம் குறித்த சுவாரசியமான தகவல்களைப் பகிர்ந்துள்ளார். குறிப்பாக, விஜய்யின் திரைவாழ்வில் மிகப்பெரிய திருப்புமுனையாக அமைந்த ‘காதலுக்கு மரியாதை’ படத்தில் நடிக்கும் வாய்ப்பு முதலில் தனக்கே வந்ததாகவும், கால்ஷீட் நெருக்கடியால் அந்த வாய்ப்பைத் தவறவிட்டதாகவும் அவர் தெரிவித்துள்ளார். அந்தப் படத்தைப் பார்க்கும்போதெல்லாம் சிறு வருத்தம் ஏற்பட்டாலும், தலைவிதிப்படி தான் எல்லாம் நடக்கும் என்ற பக்குவமான மனநிலையில் அதனைக் கடந்துவிட்டதாக அவர் நெகிழ்ச்சியுடன் கூறியுள்ளார்.
90-களில் “சாக்லேட் பாய்” எனப் புகழப்பட்ட அப்பாஸ், பல ஆண்டுகளுக்குப் பிறகு தற்போது சமூக வலைதளங்களில் இணைந்தபோதும் ரசிகர்கள் காட்டும் மாறாத அன்பைக் கண்டு ஆச்சரியப்படுவதாகக் குறிப்பிட்டுள்ளார். இப்போதும் தனக்கு ஏராளமான ப்ரபோசல் வருவதாகவும், அவற்றில் சில வேடிக்கையாகவும், சில முகம் சுளிக்க வைக்கும் வகையிலும் இருப்பதாகவும் அவர் வெளிப்படையாகப் பேசியுள்ளார். நட்பு, காதல் மற்றும் சினிமா எனப் பல விஷயங்களைத் தற்போதைய சூழலோடு ஒப்பிட்டுப் பேசியுள்ள அப்பாஸின் இந்த நேர்காணல், அவரது மறுபிரவேசத்தைக் கொண்டாடும் ரசிகர்களிடையே பெரும் வரவேற்பைப் பெற்றுள்ளது.