தமிழகத்தில் 2026 சட்டமன்றத் தேர்தலை முன்னிட்டு, மதுபானம் விநியோகிப்பதில் அரசியல் தலையீடுகளைத் தவிர்க்கவும், முறைகேடுகளைக் கட்டுப்படுத்தவும் இந்திய தேர்தல் ஆணையம் மற்றும் டாஸ்மாக் நிர்வாகம் இணைந்து அதிரடி கட்டுப்பாடுகளை விதித்துள்ளன. இதன்படி, அரசியல் கட்சிகள் வாக்காளர்களுக்கு வழங்கும் டோக்கன்கள் அல்லது ரசீதுகளைப் பயன்படுத்தி மதுபானம் விற்பனை செய்யக் கடும் தடை விதிக்கப்பட்டுள்ளது. மேலும், ஒவ்வொரு டாஸ்மாக் கடையிலும் இருப்பு வைக்கப்படும் மதுபானத்தின் அளவு, கடந்த ஆண்டின் இதே காலப்பகுதியுடன் ஒப்பிடும்போது 50 சதவீதத்திற்கு மேல் அதிகரிக்கக் கூடாது என்று உத்தரவிடப்பட்டுள்ளது.
இந்தக் கண்காணிப்பு நடவடிக்கையின் ஒரு பகுதியாக, விற்பனை அளவிலும் சில முக்கிய நிபந்தனைகள் விதிக்கப்பட்டுள்ளன. ஏதேனும் ஒரு கடையின் மாதாந்திர விற்பனை, கடந்த ஆண்டை விட 30 சதவீதத்திற்கு மேல் அதிகரித்தால், அது வழக்கத்திற்கு மாறான ‘மொத்தக் கொள்முதலாக’ கருதப்படும். இத்தகைய சூழலில், அந்த விற்பனை குறித்து முறையான விசாரணை நடத்தப்பட்டு, அதில் தேர்தல் விதிமீறல்கள் ஏதேனும் உள்ளதா என்பது ஆய்வு செய்யப்படும் எனத் தெரிவிக்கப்பட்டுள்ளது. தேர்தலின் போது மதுபானம் மூலம் வாக்காளர்களைக் கவரும் முயற்சியைத் தடுப்பதே இந்தக் கடுமையான கட்டுப்பாடுகளின் முக்கிய நோக்கமாகும்.