ஈரான் உச்ச தலைவர் காமேனி கொல்லப்பட்டதை அடுத்து, அந்நாடு அமெரிக்க மற்றும் இஸ்ரேலிய இலக்குகளைத் தாக்கி வருவதுடன் ஹார்முஸ் ஜலசந்தியையும் மூடியுள்ளது. இதற்குப் பதிலடியாக, அடுத்த 48 மணி நேரத்திற்குள் ஜலசந்தி திறக்கப்படாவிட்டால் ஈரானின் மின் உற்பத்தி நிலையங்கள் மீது தாக்குதல் நடத்தப்படும் என அமெரிக்க அதிபர் டிரம்ப் கடும் எச்சரிக்கை விடுத்துள்ளார். இந்த மிரட்டலுக்குப் பதிலடி கொடுத்துள்ள ஈரான், தங்கள் நாட்டின் மின் நிலையங்கள் சேதப்படுத்தப்பட்டால், அமெரிக்க ராணுவத் தளங்களுக்கு மின்சாரம் வழங்கும் அண்டை நாடுகளின் மின் நிலையங்களையும் குறிவைப்போம் என அதிரடியாக அறிவித்துள்ளது.
இது தொடர்பாக ஈரானின் புரட்சிகர காவலர் படை வெளியிட்டுள்ள அறிக்கையில், இஸ்ரேலின் மின் நிலையங்கள் மற்றும் அமெரிக்கர்களுக்குச் சொந்தமான பொருளாதார உள்கட்டமைப்புகளும் தங்களின் தாக்குதல் வளையத்திற்குள் வரும் எனத் தெளிவாகக் கூறியுள்ளது. ஹார்முஸ் ஜலசந்தி முடக்கத்தால் ஆசிய நாடுகளில் எரிபொருள் தட்டுப்பாடு ஏற்படும் அபாயம் உருவாகியுள்ள நிலையில், இரு நாடுகளும் மின் நிலையங்களை அழிப்போம் என மாறி மாறி எச்சரிப்பது உலகப்போருக்கான அச்சத்தை அதிகரித்துள்ளது. இந்த விவகாரத்தில் ஈரான் தனது முடிவில் பின்வாங்கப் போவதில்லை என்பதையும் மிக உறுதியாகப் பதிவு செய்துள்ளது.