பாகிஸ்தான் சூப்பர் லீக் 2026 தொடர் தொடங்குவதற்கு முன்பே, எட்டு முக்கிய வெளிநாட்டு வீரர்கள் அதிலிருந்து விலகியிருப்பது பாகிஸ்தான் கிரிக்கெட் வாரியத்திற்கு பெரும் பின்னடைவாக அமைந்துள்ளது. ஆஸ்திரேலியாவின் அதிரடி ஆட்டக்காரர் ஜேக் பிரேசர்-மெக்கர்க் மற்றும் வேகப்பந்து வீச்சாளர் ஸ்பென்சர் ஜான்சன் ஆகியோர் விலகியவர்களில் குறிப்பிடத்தக்கவர்கள்.
மேலும் இவர்களைத் தவிர, ஆப்கானிஸ்தானைச் சேர்ந்த ரஹ்மானுல்லா குர்பாஸ் மற்றும் பல வீரர்கள் தனிப்பட்ட காரணங்களுக்காகவும், பாதுகாப்பு கவலைகள் காரணமாகவும் இத்தொடரில் பங்கேற்கப் போவதில்லை என்று அறிவித்துள்ளனர். இந்த திடீர் மாற்றங்கள் பிஎஸ்எல் தொடரின் மீதான நம்பகத்தன்மையைக் குறைப்பதாக விளையாட்டு விமர்சகர்கள் கருதுகின்றனர்.
இதனால் வீரர்கள் விலகியதற்கான பின்னணியில் வரவிருக்கும் ஐபிஎல் 2026 சீசன் முக்கிய காரணமாகக் கருதப்படுகிறது. விலகிய பல வீரர்களுக்கு ஐபிஎல் அணிகளிடமிருந்து மாற்று வீரர்களாக விளையாட அழைப்பு வந்துள்ளதாகவோ அல்லது பேச்சுவார்த்தை நடைபெற்று வருவதாகவோ தகவல்கள் தெரிவிக்கின்றன.
இந்நிலையில் பணபலம் மற்றும் புகழில் முன்னணியில் இருக்கும் ஐபிஎல் தொடருக்கு முன்னுரிமை அளிக்கும் நோக்கில், வீரர்கள் பிஎஸ்எல் தொடரைத் தவிர்ப்பதாகக் கூறப்படுகிறது. பாகிஸ்தான் கிரிக்கெட் வாரியம் சட்ட ரீதியான நடவடிக்கைகளை எடுப்பதாக எச்சரித்தாலும், சர்வதேச வீரர்கள் தங்கள் முடிவில் உறுதியாக இருப்பது அந்த நாட்டு கிரிக்கெட் நிர்வாகத்திற்கு ஒரு தர்மசங்கடமான சூழலை ஏற்படுத்தியுள்ளது.