மத்திய கிழக்கில் ஈரான், இஸ்ரேல் மற்றும் அமெரிக்கா இடையே போர் மேகங்கள் சூழ்ந்துள்ள நிலையில், முன்னாள் பாகிஸ்தான் தூதர் அப்துல் பசித் வெளியிட்டுள்ள மிரட்டல் விடுத்த கருத்துகள் சர்வதேச அளவில் பெரும் அதிர்வலைகளை ஏற்படுத்தியுள்ளன. ஒருவேளை அமெரிக்காவோ அல்லது இஸ்ரேலோ பாகிஸ்தானின் அணுசக்தி நிலையங்கள் மீது தாக்குதல் நடத்தினால், அதற்குப் பதிலடியாக இந்தியா மீது ஏவுகணைத் தாக்குதல் நடத்துவோம் என்று அவர் கூறியுள்ளார். நேரடியாகத் சம்பந்தமில்லாத ஒரு மோதலில் இந்தியாவை இழுப்பது, பாகிஸ்தானின் விரக்தியையும் அதன் பொறுப்பற்ற வெளியுறவுக் கொள்கையையுமே வெளிச்சம் போட்டுக் காட்டுகிறது.
பாகிஸ்தானின் இந்த ‘பகீர்’ கருத்துக்குப் பின்னால் உள்ள தர்க்கம் மிகவும் விசித்திரமானது. தூரம் காரணமாக அமெரிக்காவையோ அல்லது இஸ்ரேலையோ தங்களால் நேரடியாகத் தாக்க முடியாமல் போகலாம் என்றும், வளைகுடா நாடுகளில் உள்ள அமெரிக்கத் தளங்களை எட்டுவது கடினம் என்றும் பசித் ஒப்புக்கொள்கிறார். இத்தகைய இக்கட்டான சூழலில், தங்களின் கோபத்தைக் காட்டவும் தற்காத்துக் கொள்ளவும் டெல்லி மற்றும் மும்பை போன்ற இந்திய நகரங்களை இலக்காகக் கொள்வதைத் தவிர பாகிஸ்தானுக்கு வேறு வழியில்லை என்று அவர் திமிராகப் பேசியுள்ளார். இது தெற்காசியப் பிராந்தியத்தின் அமைதியைக் குலைக்கும் ஒரு விஷமத்தனமான கருத்தாகும்.
இருப்பினும், இத்தகைய சூழல் உருவாவதற்கான வாய்ப்புகள் மிகக் குறைவு என்று அவரே ஒருபுறம் மழுப்பினாலும், “தாக்குதலின் விளைவுகளைப் பற்றி அப்போது கவலைப்பட மாட்டோம்” என்று கூறியிருப்பது அணு ஆயுதப் போர் குறித்த அச்சத்தை விதைக்கிறது. 2014 முதல் 2017 வரை இந்தியாவுக்கான பாகிஸ்தான் தூதராகப் பணியாற்றிய ஒருவரே இவ்வளவு முதிர்ச்சியற்ற கருத்தைக் கூறியிருப்பது, அந்நாட்டின் உயர்மட்ட அதிகாரிகளிடையே நிலவும் இந்தியாவுக்கு எதிரான வன்மத்தை உணர்த்துகிறது. கச்சா எண்ணெய் விலை உயர்வு மற்றும் பொருளாதார நெருக்கடிகளுக்கு இடையே, இத்தகைய தேவையற்ற சீண்டல்கள் பதற்றத்தை மேலும் அதிகரிக்கின்றன.
வரலாற்றைப் பின்னோக்கிப் பார்த்தால், கடந்த காலப் போர்களில் இந்தியாவால் பாகிஸ்தான் சந்தித்த தோல்விகளும், ‘ஆபரேஷன் ட்ரைடென்ட்’ (Operation Trident) போன்ற அதிரடித் தாக்குதல்களும் அந்நாட்டிற்கு இன்னும் ஆறாத வடுவாகவே இருக்கின்றன. இந்தியப் பாதுகாப்புத் துறை எப்போதும் விழிப்புடன் இருக்கும் நிலையில், உலக நாடுகளின் கவனத்தைத் திசைதிருப்ப பாகிஸ்தான் மேற்கொள்ளும் இத்தகைய வெற்று மிரட்டல்கள் பலனளிக்கப் போவதில்லை. சர்வதேசச் சமூகமும் பாகிஸ்தானின் இந்த பொறுப்பற்ற போக்கைக் கண்டிப்பதோடு, இந்தியாவின் இறையாண்மைக்கு எத்தகைய அச்சுறுத்தல் வந்தாலும் அதைச் சமாளிக்க இந்தியா தயார் நிலையிலேயே உள்ளது.