அமெரிக்காவின் ஓஹாயோ மாகாணத்தில், ஒரு தனியார் நிறுவனம் தனது பெண் ஊழியருக்கு ‘வீட்டிலிருந்து வேலை’ (Work From Home) வழங்க மறுத்த விவகாரம் சர்வதேச அளவில் பெரும் பரபரப்பை ஏற்படுத்தியுள்ளது. அந்தப் பெண் ஊழியர் ‘ஹை-ரிஸ்க்’ எனப்படும் அதிக ஆபத்துள்ள கர்ப்ப காலச் சூழலில் இருந்தபோதிலும், அவரது உடல்நிலையைக் கருத்தில் கொள்ளாமல் நிறுவனம் அவருக்கு சலுகை வழங்க மறுத்துள்ளது. மாறாக, அவரை கட்டாயம் அலுவலகத்திற்கு வர வேண்டும் அல்லது ஊதியம் இல்லாத விடுப்பில் செல்ல வேண்டும் என அந்த நிறுவனம் நெருக்கடி கொடுத்துள்ளது.
நிறுவனத்தின் பிடிவாதத்தால், அந்தப் பெண் தனது உடல்நிலையை பொருட்படுத்தாமல் தொடர்ந்து அலுவலகத்திற்குச் சென்று வேலை பார்த்துள்ளார். இதன் விளைவாக, அவருக்குப் பிரசவத்தின்போது கடுமையான சிக்கல்கள் ஏற்பட்டு, துரதிர்ஷ்டவசமாகப் பிறந்த சில நாட்களிலேயே அந்தப் பிஞ்சு குழந்தை உயிரிழந்தது. தனது குழந்தையின் மரணத்திற்கு நிறுவனத்தின் மனிதாபிமானமற்ற அணுகுமுறையே காரணம் என அந்தப் பெண் நீதிமன்றத்தில் வழக்குத் தொடர்ந்தார்.
இந்த வழக்கை விசாரித்த ஓஹாயோ நீதிமன்றம், ஊழியரின் உடல்நலன் மற்றும் மருத்துவத் தேவைகளைப் புறக்கணித்த நிறுவனத்திற்கு மிகக் கடுமையான தண்டனையை வழங்கியுள்ளது. பாதிக்கப்பட்ட பெண்ணுக்கு சுமார் 211 கோடி ரூபாய் (25 மில்லியன் டாலர்) இழப்பீடாக வழங்க வேண்டும் என்று நீதிமன்றம் அதிரடி உத்தரவு பிறப்பித்துள்ளது. நிறுவனங்களின் லாபத்தை விட ஊழியர்களின் உயிர் மற்றும் அடிப்படை உரிமைகள் மேலானது என்பதை இந்தத் தீர்ப்பு உலகிற்கு உரக்கச் சொல்லியுள்ளது.