அமெரிக்கா மற்றும் ஈரான் இடையே மூண்டுள்ள போர் மூன்றாவது வாரத்தை எட்டியுள்ள நிலையில், உலகப் பொருளாதாரத்தின் உயிர்நாடியாகக் கருதப்படும் ஹார்முஸ் நீரிணையில் பெரும் பதற்றம் நிலவுகிறது. அமெரிக்கா மற்றும் இஸ்ரேலின் தாக்குதல்களுக்குப் பதிலடியாக, ஈரான் இந்த முக்கிய கடல்வழிப் பாதையை மூடியுள்ளது. சர்வதேச எண்ணெய் விநியோகத்தில் 20 சதவீதத்தைக் கொண்டுள்ள இந்த வழித்தடம் முடங்கியுள்ளதால், உலகளவில் கச்சா எண்ணெய் விலை கடுமையாக உயர்ந்துள்ளதுடன் எரிவாயு தட்டுப்பாடும் ஏற்பட்டுள்ளது.
இந்த இக்கட்டான சூழலில், ஹார்முஸ் நீரிணை வழியாகச் செல்லும் வணிகக் கப்பல்களின் பாதுகாப்பை உறுதி செய்ய இங்கிலாந்து, ஜெர்மனி, பிரான்ஸ், ஜப்பான் மற்றும் தென் கொரியா உள்ளிட்ட 20-க்கும் மேற்பட்ட நாடுகள் முன்வந்துள்ளன. ஈரானின் இந்த நடவடிக்கைக்குக் கடும் கண்டனம் தெரிவித்துள்ள இந்நாடுகள், சர்வதேசக் கடல் போக்குவரத்துச் சுதந்திரத்தைப் பாதுகாக்க ஒருங்கிணைந்த ராணுவப் பாதுகாப்பு நடவடிக்கைகளை மேற்கொள்ளத் தயாராக இருப்பதாகத் தங்களின் கூட்டறிக்கையில் தெரிவித்துள்ளன.
முன்னதாக, நேட்டோ நாடுகள் உதவிக்கு வராததை “காகிதப் புலி” என விமர்சித்திருந்த அமெரிக்க அதிபர் டிரம்ப், தற்போது 22 நாடுகள் ஒன்றிணைந்துள்ளதை வரவேற்றுள்ளார். கடந்த 19 நாட்களில் வெறும் 116 கப்பல்கள் மட்டுமே இந்த நீரிணையைக் கடந்துள்ளன, இது வழக்கமான போக்குவரத்தை விட 95 சதவீதம் குறைவு என்பது குறிப்பிடத்தக்கது. எண்ணெய் மற்றும் எரிவாயு நிலையங்கள் போன்ற பொதுமக்கள் உள்கட்டமைப்புகள் மீதான தாக்குதல்களை ஈரான் உடனடியாக நிறுத்த வேண்டும் என்றும் இந்த நாடுகள் வலியுறுத்தியுள்ளன.
சர்வதேச நாடுகளின் இந்தத் தலையீடு வளைகுடா பிராந்தியத்தில் போர் மேகங்களை மேலும் சூழச் செய்துள்ளது. தங்களின் எல்லைக்கு அருகே அந்நிய நாடுகளின் படைகள் குவிக்கப்படுவதை ஈரான் எவ்வாறு எதிர்கொள்ளப் போகிறது என்பது குறித்த அச்சம் உலக நாடுகளிடையே எழுந்துள்ளது. ஈரானின் அடுத்தகட்ட நகர்வைப் பொறுத்தே உலகப் பொருளாதாரத்தின் எதிர்காலமும், எரிசக்தி சந்தையின் ஸ்திரத்தன்மையும் அமையும் என்பதால் சர்வதேச சமூகம் இந்தப் பகுதியை உன்னிப்பாகக் கவனித்து வருகிறது.