அகமதாபாத்தில் உள்ள சோலா சிவில் மருத்துவமனையில் அரங்கேறியுள்ள இந்த அதிர்ச்சிகரமான சம்பவம், மருத்துவர்கள் மற்றும் நோயாளிகளுக்கு இடையிலான உறவில் பெரும் விவாதத்தை ஏற்படுத்தியுள்ளது. தனது குழந்தைக்கு சிகிச்சை பெறுவதற்காக மருத்துவமனைக்கு வந்த தந்தையிடம், அங்கு பணியில் இருந்த பெண் மருத்துவர் மிகவும் அநாகரீகமாக நடந்து கொண்டுள்ளார்.
மேலும் குழந்தையின் உடல்நிலை குறித்து கவலையுடன் வந்த தந்தைக்கு ஆறுதல் அளிப்பதற்கு பதிலாக, அந்த மருத்துவர் ஆத்திரமடைந்து அவரைத் தாக்கியதுடன், கன்னத்தில் அறைந்துள்ளார். ஒரு அரசு மருத்துவமனையில் சிகிச்சை அளிக்க வேண்டிய மருத்துவரே இத்தகைய வன்முறையில் ஈடுபட்டது அங்கிருந்தவர்களிடையே பெரும் அதிர்ச்சியை ஏற்படுத்தியது.
இதனால் மருத்துவரின் இந்த அத்துமீறலை அந்த நபர் தனது செல்போனில் வீடியோவாகப் பதிவு செய்யத் தொடங்கியதும், நிலைமையின் தீவிரத்தை உணர்ந்த மருத்துவர் அங்கிருந்து தப்பியோட முயன்றார். இந்த வீடியோ தற்போது சமூக வலைதளங்களில் வைரலாகி வரும் நிலையில், பொதுமக்களிடையே கடும் கண்டனங்கள் எழுந்துள்ளன.
இந்நிலையில் ஏழை எளிய மக்கள் நம்பி வரும் அரசு மருத்துவமனைகளில் இதுபோன்ற பொறுப்பற்ற மற்றும் வன்முறையான அணுகுமுறை கண்டிக்கத்தக்கது என்றும், சம்பந்தப்பட்ட பெண் மருத்துவர் மீது மருத்துவமனை நிர்வாகம் மற்றும் காவல்துறை கடுமையான நடவடிக்கை எடுக்க வேண்டும் என்றும் கோரிக்கைகள் வலுத்து வருகின்றன.