மத்திய கிழக்கு நாடுகளில் நிலவி வரும் போர் பதற்றத்தால் உலக நாடுகளின் எரிசக்தி வர்த்தகம் கடுமையாகப் பாதிக்கப்பட்டுள்ளது. இந்தச் சூழலில், ஈரானை ஒட்டியுள்ள ஹார்முஸ் நீர் இணை (Strait of Hormuz) வழியாகச் செல்லும் கப்பல்களுக்குக் கட்டணம் மற்றும் வரிகளை வசூலிக்க ஈரான் அரசு திட்டமிட்டுள்ளது. இதற்கான புதிய சட்டத்தைக் கொண்டு வருவது குறித்து அந்நாட்டு நாடாளுமன்றம் தற்போது தீவிரமாகப் பரிசீலித்து வருகிறது.
உலகப் பொருளாதாரத்தில் மிக முக்கியப் பங்கு வகிக்கும் இந்த கடல் வழிப்பாதையில் வரி விதிக்கப்படுவது பெரும் விவாதத்தைக் கிளப்பியுள்ளது. சர்வதேச கப்பல் போக்குவரத்து மற்றும் கச்சா எண்ணெய் விநியோகத்தில் இந்த முடிவு பெரிய தாக்கத்தை ஏற்படுத்தும் என்று எதிர்பார்க்கப்படுகிறது. இந்த நடவடிக்கை, ஏற்கனவே நெருக்கடியில் இருக்கும் உலக எரிசக்திச் சந்தையை மேலும் சிக்கலுக்குள்ளாக்க வாய்ப்புள்ளது.