அதிமுகவின் முக்கியப் புள்ளிகளான ஓ. பன்னீர்செல்வம், வைத்திலிங்கம் உள்ளிட்டோரைத் தொடர்ந்து, அக்கட்சியில் சீட் கிடைக்காதவர்களும் ஓரங்கட்டப்பட்டவர்களும் பெருமளவில் திமுகவில் இணையத் தயாராகி வருவதாகத் தெரிகிறது. இருப்பினும், அதிமுகவை முற்றிலும் பலவீனப்படுத்துவது தமிழக அரசியலில் பாஜகவின் வளர்ச்சிக்குச் சாதகமாக அமைந்துவிடுமோ என்ற அச்சம் திமுக தலைமைக்கு ஏற்பட்டுள்ளது.
ஒருவேளை அதிமுக நிலைகுலைந்தால், அந்த வெற்றிடத்தை பாஜக நிரப்பி பிரதான எதிர்க்கட்சியாக உருவெடுக்கும் அபாயம் இருப்பதாக உளவுத்துறை மற்றும் அரசியல் ஆலோசகர்கள் எச்சரித்ததைத் தொடர்ந்து, மாற்றுக்கட்சியினரைச் சேர்ப்பதில் முதல்வர் மு.க. ஸ்டாலின் தற்போது நிதானம் காட்டி வருவதாகவும், அதிமுகவினர் திமுகவுக்கு வருவதற்கு தற்காலிகமாகத் தடை விதித்துள்ளதாகவும் அறிவாலய வட்டாரங்கள் தெரிவிக்கின்றன.