அடுத்த சில மணி நேரங்களில் வளைகுடா நாடுகளில் உள்ள எண்ணெய் வயல்கள் மற்றும் சுத்திகரிப்பு நிலையங்கள் மீது தாக்குதல் நடத்தப்படும் என்று ஈரான் கடும் எச்சரிக்கை விடுத்துள்ளது. சவுதி அரேபியா, ஐக்கிய அரபு அமீரகம் மற்றும் கத்தார் ஆகிய நாடுகளில் உள்ள முக்கிய எண்ணெய் வயல்கள் மற்றும் சுத்திகரிப்பு நிலையங்களின் செயற்கைக்கோள் படங்களை ஈரான் ராணுவம் வெளியிட்டுள்ள விதம், அதன் இலக்குகள் எவ்வளவு துல்லியமாகத் திட்டமிடப்பட்டுள்ளன என்பதைக் காட்டுகிறது. அடுத்த சில மணி நேரங்களில் தாக்குதல் நடத்தப்படலாம் என ஈரான் கூறியுள்ளதால், அந்தப் பகுதிகளில் உள்ள தொழிலாளர்கள் மற்றும் பொதுமக்கள் உடனடியாக வெளியேற வேண்டும் என்று அறிவுறுத்தப்பட்டுள்ளனர்.
பாதுகாப்பு மற்றும் உயிர்ச்சேதங்களைத் தவிர்க்கும் நோக்கில் விடுக்கப்பட்டுள்ள இந்த அறிவிப்பு, வளைகுடா நாடுகளை மட்டுமின்றி உலக நாடுகளையும் அச்சத்தில் ஆழ்த்தியுள்ளது. எண்ணெய் உற்பத்தி நிலையங்களுக்கு அருகில் இருக்கும் பொதுமக்கள் பாதுகாப்பான இடங்களுக்குச் செல்லுமாறு ஈரான் கேட்டுக்கொண்டுள்ளது. ஈரானின் இந்த நேரடி மிரட்டலால் இப்பகுதியில் ராணுவக் கண்காணிப்பு தீவிரப்படுத்தப்பட்டுள்ளதுடன், பாதுகாப்பு ஏற்பாடுகளும் பலப்படுத்தப்பட்டுள்ளன.
சர்வதேச அளவில் கச்சா எண்ணெய் விநியோகத்தில் வளைகுடா நாடுகள் மிக முக்கியப் பங்கு வகிக்கின்றன. இத்தகைய சூழலில், உலகின் முக்கிய எண்ணெய் மையங்கள் மீது தாக்குதல் நடத்தப்பட்டால், அது உலகளாவிய எரிசக்தி விநியோகச் சங்கிலியைப் பாதிப்பதோடு, கச்சா எண்ணெய் விலையை வரலாறு காணாத அளவில் உயர்த்தக்கூடும் என்ற அச்சம் எழுந்துள்ளது. இந்த பதற்றமான சூழல் உலகப் பொருளாதாரத்தில் பெரும் தாக்கத்தை ஏற்படுத்தும் என அரசியல் வல்லுநர்கள் எச்சரிக்கின்றனர்.