தமிழக வெற்றிக் கழகத்தின் தலைவர் விஜய், மாமல்லபுரத்தில் இன்று (மார்ச் 18) நடைபெற்ற இஃப்தார் நிகழ்ச்சியில் கலந்துகொண்டு தொண்டர்களிடையே உரையாற்றினார். அப்போது பேசிய அவர், தாங்கள் அரசியலுக்கு வந்த நாள் முதலே பல்வேறு வதந்திகள் திட்டமிட்டுப் பரப்பப்பட்டு வருவதாகக் குறிப்பிட்டார். குறிப்பாக, தனது கட்சி வேறொரு அணியின் “பி-டீம்” எனச் சொல்லப்படும் அவதூறுகளுக்கு அவர் இதன்போது முற்றுப்புள்ளி வைத்தார்.
தவெக என்பது எந்தவொரு குறிப்பிட்ட அணியின் பின்னணியிலும் இயங்கவில்லை என்றும், அது முழுக்க முழுக்க “மக்களுடைய டீம்” என்றும் விஜய் திட்டவட்டமாகத் தெரிவித்தார். மேலும், தமிழகத்தில் தவெக தலைமையில்தான் ஆட்சி அமையும் என்பதில் தான் உறுதியாக இருப்பதாகவும், இதில் எந்த மாற்றமும் இல்லை என்றும் அவர் தனது பேச்சில் வலியுறுத்திக் கூறினார்.
மதச்சார்பின்மை கொள்கையில் தனது கட்சி ஒருபோதும் சமரசம் செய்துகொள்ளாது என உறுதியளித்த அவர், அரசியல் எதிரிகள் பரப்பும் பொய்யான வதந்திகளைத் தொண்டர்கள் யாரும் நம்ப வேண்டாம் எனக் கேட்டுக்கொண்டார். மக்களின் நலனை முன்னிறுத்தித் தனித்துவமான பாதையில் கட்சி பயணிக்கும் என்பதை இந்த நிகழ்ச்சியின் மூலம் அவர் மீண்டும் உறுதிப்படுத்தினார்.