தமிழக வெற்றிக் கழகத்தின் தலைவர் விஜய் வரும் சட்டமன்றத் தேர்தலில் பெரம்பூர் தொகுதியில் போட்டியிட வாய்ப்புள்ளதாகக் கூறப்படும் நிலையில், அவரை எதிர்த்துக் களம் காணத் தயார் என அவரது முன்னாள் மேலாளர் பி.டி. செல்வகுமார் அதிரடியாகத் தெரிவித்துள்ளார். திமுகவில் இணைந்துள்ள அவர், அக்கட்சியின் வேட்பாளர் நேர்காணலில் பங்கேற்ற பின் செய்தியாளர்களிடம் பேசுகையில், தலைமை வாய்ப்பளித்தால் விஜய்யை எதிர்த்துப் போட்டியிடத் தயங்கமாட்டேன் எனக் கூறினார். விஜய்யின் அரசியல் வருகையை ஒரு ‘பகல்கனவு’ என்று விமர்சித்த அவர், ரசிகர்களும் தொண்டர்களும் அவரை நம்பித் தங்கள் பணத்தையும் காலத்தையும் வீணடிக்க வேண்டாம் என எச்சரித்துள்ளார்.
சுமார் 27 ஆண்டுகள் விஜய்யுடன் நெருக்கமாகப் பணியாற்றிய அனுபவத்தைக் குறிப்பிட்ட செல்வகுமார், விஜய்க்குப் பிறருக்கு உதவும் குணமோ அல்லது ஆளுமைத் திறனோ கிடையாது எனக் கடுமையாகச் சாடினார். சொந்தக் குடும்பத்தினர் மற்றும் தன்னை நம்பி இருந்தவர்களையே அவர் கைவிட்டுவிட்டதாகக் குற்றம் சாட்டிய அவர், அரசியல் செய்ய மக்களுக்குச் சேவை செய்யும் மனப்பான்மை வேண்டும் என்றார். மேலும், தவெக ஒரு தீய சக்தி என்றும், அந்தக் கட்சி தமிழகத்திற்குத் தேவையில்லை என்றும் அவர் பேசியுள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது.