தமிழகத்தில் நடைபெறவுள்ள சட்டசபை தேர்தலை முன்னிட்டு அரசியல் களம் சூடுபிடித்துள்ளது. திமுக, அதிமுக, தவெக மற்றும் நாம் தமிழர் கட்சி என நான்கு முனை போட்டி நிலவும் சூழலில், கூட்டணி குறித்த பேச்சுவார்த்தைகள் தீவிரமாக நடைபெற்று வருகின்றன. இந்த நிலையில், திமுக கூட்டணியில் புதிதாக இணைந்துள்ள தேமுதிகவினால் அக்கட்சிக்கு பெரிய அளவிலான பலன் கிடைக்காது என்று லயோலா கல்லூரியின் முன்னாள் மாணவர்கள் நடத்திய கருத்துக் கணிப்பு முடிவுகள் அரசியல் வட்டாரத்தில் பெரும் பரபரப்பை ஏற்படுத்தியுள்ளது.
கடந்த 25 ஆண்டுகளாக லயோலா முன்னாள் மாணவர்கள் அமைப்பான ஐபிடிஎஸ் (IPDS) தொடர்ச்சியாக கருத்துக் கணிப்புகளை நடத்தி வருகிறது. தற்போதைய கணிப்பின்படி, நடிகர் விஜய்யின் தவெக 19.20% வாக்குகளைப் பெற்று முன்னிலையில் உள்ளது. அதனைத் தொடர்ந்து திமுக 17.7%, அதிமுக 15.32% என வாக்குகளைப் பெற்றுள்ளன. இந்த வரிசையில் தேமுதிகவின் பெயர் இடம்பெறாதது, அக்கட்சிக்கு பாஜகவை விட மிகக்குறைந்த வாக்குகளே கிடைக்க வாய்ப்புள்ளதைக் காட்டுகிறது.
2006 மற்றும் 2011 ஆம் ஆண்டுகளில் வலுவான வாக்கு வங்கியை வைத்திருந்த தேமுதிக, அதன்பிறகு நடந்த தேர்தல்களில் தொடர் தோல்விகளைச் சந்தித்து வருகிறது. இந்தச் சூழலில், திமுக கூட்டணியில் இணைந்து தனது செல்வாக்கை மீட்டெடுக்கலாம் என்று அக்கட்சியின் பொதுச் செயலாளர் பிரேமலதா விஜயகாந்த் நம்பியிருந்தார். ஆனால், லயோலா கருத்துக் கணிப்பு முடிவுகள் அவரது நம்பிக்கைக்கு பெரும் சவாலாக அமைந்திருக்கின்றன.
இந்த கருத்துக் கணிப்பின் முடிவுகள் திமுக கூட்டணிக்குள் சலசலப்பை ஏற்படுத்தியுள்ளது. தேமுதிகவுக்கு குறிப்பிட்ட தொகுதிகளை ஒதுக்க திமுக திட்டமிட்டுள்ள நிலையில், அக்கட்சியின் தேர்தல் பங்களிப்பு குறித்த இந்தத் தரவுகள் திமுக தலைமையினரிடையே குழப்பத்தை ஏற்படுத்தியுள்ளது. அதிமுக கூட்டணியில் இருந்தபோது தோல்விகளைச் சந்தித்த தேமுதிக, தற்போதைய கூட்டணியிலும் பெரிய மாற்றத்தை ஏற்படுத்தாது என்றே இந்த ஆய்வு சுட்டிக்காட்டுகிறது.