ஈரான், இஸ்ரேல் மற்றும் அமெரிக்கா ஆகிய நாடுகளுக்கு இடையே போர் மூளும் சூழல் நிலவி வரும் போதிலும், தங்கம் விலை எதிர்பாராத விதமாக சரிவைச் சந்தித்து வருகிறது. பொதுவாக சர்வதேச அளவில் பதற்றமான சூழல் ஏற்படும்போது பாதுகாப்பான முதலீடாகக் கருதப்படும் தங்கத்தின் விலை உயர்வதுதான் வழக்கம். ஆனால், தற்போது அதற்கு நேர்மாறாக தங்கம் விலை படிப்படியாகக் குறைந்து வருவது பொதுமக்களிடையே ஆச்சரியத்தை ஏற்படுத்தியுள்ளது.
இந்த விலை வீழ்ச்சி குறித்து விளக்கிய தங்க நகை வியாபாரிகள் சங்கத் தலைவர் ஜெயந்திலால் சலானி, தற்போதைய முதலீட்டு மாற்றமே இதற்குக் காரணம் என்று குறிப்பிட்டுள்ளார். போர்ச் சூழலால் கச்சா எண்ணெய் விலை உலகளவில் கணிசமாக உயர்ந்து வருகிறது. இதனால் லாபத்தை எதிர்பார்த்து முதலீட்டாளர்கள் தங்கத்தில் இருந்த தங்கள் முதலீடுகளைத் தற்காலிகமாகத் திரும்பப் பெற்று, கச்சா எண்ணெய் (Crude Oil) மீது அதிகளவில் முதலீடு செய்து வருகின்றனர். இந்த முதலீட்டு மாற்றமே தங்கம் விலை குறைய முக்கிய காரணியாக உள்ளது.
இருப்பினும், இந்த விலை குறைவு தற்காலிகமானது என்று அவர் எச்சரித்துள்ளார். தற்போதைய பதற்றங்கள் தணிந்து போர்ச் சூழல் முடிவுக்கு வரும்போது, முதலீட்டாளர்கள் மீண்டும் தங்கத்தை நோக்கித் திரும்புவார்கள். அந்த நேரத்தில், தங்கம் விலை எந்த வேகத்தில் குறைந்ததோ, அதே வேகத்தில் மிகக் கடுமையாக உயர வாய்ப்புள்ளதாக அவர் கணித்துள்ளார். எனவே, தங்கம் வாங்கத் திட்டமிடுபவர்களுக்கு இந்த விலைக் குறைவு ஒரு நல்வாய்ப்பாகவே பார்க்கப்படுகிறது.