மத்திய கிழக்கு பிராந்தியத்தில் நிலவி வரும் போர் பதற்றங்களுக்கு இடையே, உலக வர்த்தகத்தின் முக்கிய வழித்தடமான ஹார்முஸ் ஜலசந்தியை ஈரான் முடக்கியுள்ளது. அரபிக் கடலையும் ஓமன் வளைகுடாவையும் இணைக்கும் இந்த குறுகிய பாதை வழியாகவே இந்தியா உள்ளிட்ட நாடுகளுக்கு கச்சா எண்ணெய் மற்றும் எல்பிஜி கேஸ் விநியோகம் நடைபெறுகிறது. தற்போது நிலவி வரும் சூழலால் இந்தியாவில் எரிபொருள் தட்டுப்பாடு ஏற்படும் அபாயம் உருவானதுடன், நாட்டின் பொருளாதாரமும் பாதிக்கப்படும் சூழல் ஏற்பட்டது.
இந்த இக்கட்டான நிலையில், இந்திய வெளியுறவுத்துறை அமைச்சர் எஸ். ஜெய்சங்கர், ஈரானிய வெளியுறவு அமைச்சர் அப்பாஸ் அரக்சியுடன் தொலைபேசி வாயிலாக தீவிர ஆலோசனை நடத்தினார். அப்போது, இந்தியாவின் எரிசக்தி தேவைகளையும், இரு நாடுகளுக்கும் இடையே நிலவும் நீண்ட கால நட்புறவையும் அவர் சுட்டிக்காட்டினார். இந்தியாவிற்கு வரும் சரக்குக் கப்பல்களின் பாதுகாப்பை உறுதி செய்ய வேண்டும் என்ற இந்தியாவின் கோரிக்கையை ஈரான் கனிவுடன் பரிசீலித்தது.
இது குறித்து கருத்து தெரிவித்த இந்தியாவுக்கான ஈரான் தூதர் முகமது ஃபத்தாலி, இந்தியாவும் ஈரானும் மிகச்சிறந்த நண்பர்கள் என்றும், ஈரானிய அதிகாரிகள் இந்தியக் கப்பல்களுக்குத் தேவையான உதவிகளை வழங்கத் தயாராக இருப்பதாகவும் உறுதி அளித்தார். “இந்திய மக்களின் துன்பம் ஈரானின் துன்பம்” என்று குறிப்பிட்ட அவர், இந்தியாவிற்குச் செல்லும் கப்பல்கள் பாதுகாப்பாக அந்தப் பாதையைக் கடக்க ஈரான் முழு ஒத்துழைப்பு வழங்கும் என்று தெரிவித்தார்.
ஈரானின் இந்த அறிவிப்பு இந்தியாவிற்குப் பெரும் நிம்மதியை அளித்துள்ளது. ஹார்முஸ் ஜலசந்தியில் ஈரான் கண்ணிவெடிகளை விரித்துள்ளதாகக் கூறப்படும் நிலையில், இந்தியக் கப்பல்களுக்கு மட்டும் வழங்கப்பட்டுள்ள இந்த சிறப்பு அனுமதி, இரு நாடுகளுக்கும் இடையிலான வலுவான ராஜதந்திர உறவைப் பறைசாற்றுகிறது. இதன் மூலம் இந்தியாவின் கச்சா எண்ணெய் இறக்குமதி தடையின்றி தொடர்வதற்கான வாய்ப்புகள் உருவாகியுள்ளன.